qineqqusaarutit
S-imi politikeri: Qineqqusaarutigisavut eqquutsinngilagut
Naalakkersuisooqatigiit qaqagu qineqqusaarutigisaminnik eqquutitsilissanersut Siumumi politikkerip apeqqutigaa
Inatsisartuni ilaasortaq Siumumeersup Nikolaj Jeremiassen malillugu umiatsiaararsorlutik aalisartut Kalaallit Nunaanni ikiliartorput, aamma aalisartut isumaat tusaaniarneqartalernissaat pingaartippaa. Aalisartut ilisimasaat biologillu ilisimasaat qineqqusaarnermi assigiimmik ingerlalernissaat oqaatigineqaraluartoq suli eqquutsinneqanngitsoq oqaatigaa.
Naalakkersuisooqatigiit ukioq ataaseq atareerput, ilaatigulli Partii Inuit naalakkersuisooqatigiinnit ilaajunnaartinneqarlutik. Aalisartut pillugit qineqqusaarutit piviusunngortinneqartariaqartut Nikolaj Jeremiassen piumasaqaateqarpoq.
'Biologit aalisartullu ilisimasaat malillugit naligiimmik pisassiisoqartalernissaa Siumumit sulissutigineqassaaq'.
Aalisartut ikiliartortut
Siumup qineqqusaartutaani ilaatigut taama allaqqasoqarpoq. Qineqqusaarutilli piviusunngortinneqarsimannginnera Nikolaj Jeremiassenimit naammagineqanngilaq Naalakkersuisooqatigiinnullu paragraf 37-mik apeqquteqarluni.
- Piniartut ilisimasaat tusaaniarneqarnerulernissaat ilaatigut Siumup qineqqusaarutigaa. Qaqagumita tamanna aallartinneqassava, maannakkummi pissutsit takutippaa taanna atuutilerneqarsinnaanngitsoq, Nikolaj Jeremiassen oqarpoq.
Umiatsiaararsorlutik aalisartut ikilisimanerat ilaatigut maluginiarsimavaa, Naalakkersuisut qanoq tamanna iliuuseqarfigissamaarneraat aamma apeqqutigaa.