Urani
S: GME-mut akuersissummik tunniussinissamut Múte akuersitinneqarsinnaavoq
Uranimut akerliusoq Múte Bourup Egede (IA), uranimik akulinnik piiaanissamut akuersissummik siulliulluni tunniussisooratarsinnaavoq. Jens-Erik Kirkegaard (S) taama isumaqarpoq
Avatangiisinut aamma isumannaallisaanermut piumasaqaatit naammassineqarpata, Kuannersuarni uranimik akulinnik aamma aatsitassanik qaqutigoortunik piiaaffik piviusunngortinneqassaaq. Siumumi Inatsisartut gruppianni siulittaasoq Jens-Erik Kirkegaard taama isumaqarpoq.
Atuaruk: Uran – naalakkersuisooqatigiinni qaaratarsinnaasoq
Inatsisit malinneqassasut
Maanna atsitassanut naalakkersuisuusup uranimut akerliunera annerusumik apeqqutaanngitsoq, taanna isumaqarpoq. Naalakkersuisoqatigiinnermut isumaqatigiissummi partiit uranimut tunngatillugu isumaqatigiinnginnertik attanneqarniartoq naqissuserneqarnera aamma annerusumik sunniuteqarnaviannginnerarpaa.
- Naalakkersuisunngortup inatsisit malittariaqarpai, GME qinnuteqaateqarpat politikkikkut aalajangiiginnarsinnaanngilaq, Jens-Erik Kirkegaard oqarpoq.
Taanna aamma Naalakkersuisut siulittaasuata Kim Kielsenip naalakkersuisoqatigiilersut saqqummiunneqarnerini naqissusiinera erseqqissaatigaa, qinnuteqaatinut suliat ingerlareersut inatsisit maleruagassallu naapertorlugit ingerlanneqarumaartut.
Naalakkersuisut qinnuteqaat suliarissavaat
Aatsitassanut naalakkersuisup Múte Bourup Egedep (IA), nammineerluni Qanoruumut neriorsuutigaa, aatsitassanut inatsit naapertorlugu qinnuteqaat suliariniarlugu.
- Naalakkersuisut akuersissutinik agguaallutillu qinnuteqaatinik suliarinnittarput. Inatsisinillu malittarisassaqarpugut, taakkulu malinneqarnissaat qulakkiissavarput, novembarip aallaqqaataani Qanoruumut taanna oqarpoq.
Atuaruk: Múte Bourup Egede sangujoraartoq
Avatangiisinik naliliineq
Piiaanissamut qinnuteqaat ukiup ataatsip ingerlanerani tunniunnissaa naatsorsuutigalugu, GME nalunaaruteqarnikuuvoq. Tassungalu tunngatillugu avatangiisinut naliliinermik, VVM-mik taaguuteqartumik suliaqarnertik maanna ingerlappaat.
- Avatangiisit pillugit naliliineq naapertorlugu, avatangiisinut navianartorsiortitsisoqarsinnaanersoq ilisimasallit attuumassuteqanngitsut nalilissavaat. Taakkunanngalu naalakkersuisumut innersuussusiussapput, Jens-Erik Kirkegaard oqarpoq, taanna ilisimaneqareersutut aatsitassanut naalakkersuisuunikuuvoq.
Atuaruk: Naalakkersuisooqatigiilersut uranimut aalajangiinissaq kinguartippaat
Suka K. Frederiksenimit suliarineqartussaq
Tamatuma kingorna Múte Bourup Egedep (IA) naalakkersuisoqarfiata avatangiisinut nalilersuineq suliarissanngilaa. Taanna pinngortitamut avatangiisinullu naalakkersuisoqarfimmi suliarineqassaaq, tassani uranimut akuersaartoq Suka K. Frederiksen Siumumeersoq politikkikkut piortaavoq.
- GME-p soorunami avatangiisinut, isumannaallisaanermut aamma inuiaqatigiinnut tunngatillugu piumasaqaatit naammassissavaat. Naammassigunikkit piaanissamut akuersissummik pissarsinissamik periarfissat tamaasa pigissavai, Jens-Erik Kirkegaard isumaqarpoq.
Atuaruk: Urani suli akerleriissutaaqaaq
GME-mut periarfissaqarluartoq
Piumasaqaatinik naammassinnikkaanni, maanna maleruagassaasut naapertorlugit akuersissummik pissarsisoqarsinnaasoq, taassuma oqaatigaa. Taanna inatsisitigut piumasaqaat uranimoqqissaaq atuutinngilaq. Kisianni uranitalinnik attueqqusivinnginneq peerneqareersimalerpoq.
- Suliaq ima siuarsimatigimmat nalilerpara, GME maanna akuersissummik pissarsinissaminut inatsisitigut piumasaqarsinnaasoq, Jens-Erik Kirkegaard oqarpoq.