Aningaasaliissutinut uparuaapput
S-borgmesterit: Akileraartartut sallunaveeqqutitut tigummineqaqqilerput
Borgmesterit Siumumeersut isumaqarput nunatsinni akileraartartut sallunaveeqqutitut tigummineqartut Nuummut aningaasaliinerit, Nuummilu akiitsut malunnaatilimmik qaffakkaluttuinnarneranni
Nunap ineriartortinneqarnissaa pillugu Naalakkersuisut borgmesterillu ulluni makkunani ataatsimiipput.
Nunatsinni borgmesterini sisamaasuni pingasut, tamarmik Siumumik tunuliaqutaqartut isumaqarput nunatsinni akileraartartut sallunaveeqqutitut tigummineqartut nunatsinni illoqarfiit pingaarnersaanni aningaasaliisoqarluni akiitsut qaffakkaluttuinnarneranni.
- Illuatungaatigut nuna tamakkerlugu aktianik piginneqatigiiffiit akiitsui appartut, aktianik piginneqatigiiffiup ataatsip, tassaasup Illuut A/S-ip akiitsui milliard koruunit tungaannut qaffakkiartorput. Illuut A/S illoqarfiit pingaarnersaanni inissianut allaffeqarfinnullu aningaasaliinikuuvoq. Taamaalilluni Nuummi aningaasaliinernut taakkununnga Nuup avataani nunami innuttaasut aningaasaliisuupput, borgmesterit Siumukkormiut pingasut, Hermann Berthelsen, Ole Dorph aamma Jørgen Wæver Johansen ataatsimoorlutik tusagassiuutinut nalunaaruteqarlutik taama allapput.
Grafikki: Nuummi umiarsualivilik ima isikkoqassaaq
Atuaruk: Containerinut umiarsualivittaassaq aningaasaliiffigineqarpoq
Innuttaasut sallunaveeqqutitut tigoqqippaat
Taakkua borgmesterit pingasut Siumumik tamarmik tunuliaqutaqartut isumaqarput oqaluttuaq taanna Nuummi containerersorfiusumik talittarfiliortoqarnissaani, Sikuki Nuuk Harbour A/S-mik pilersitsinermi nanginneqaqqittoq.
- Sikuki Nuuk Harbour A/S Nuummi nutaamik umiarsualiviliornissaminut 1⁄2 milliarder koruuninik attartortussaavoq. Kingumut nunami akileraartartut qularnaveeqqusiisussanngorput. Sinerissap sinneranit suliffeqarfinnik tigooraasussamut aningaasaliinermut qularnaveeqqusiisussanngorlutik, borgmesterit Siumukkormiut pingasut taama allapput.
Atuaruk: Nuup umiarsualiviata siulersuisui aajuku
Nuummi aningaasaliineq isoraat
Siumukkormiut taakkua borgmesterit pingasut isumaat naapertorlugu nuna tamakkerlugu aktianik piginneqatigiiffiit sukateralutik nuna tamakkerlugu attaveqaqatigiinnermut tunngasunut attartorsinnaanatik, Namminersorlutik Oqartussat illoqarfiit annersaanni aktianik piginneqatigiiffimminnut nutaamut nangaassuteqaratik qularnaveeqqusiinialerput.
- Illoqarfiit annersaaniinnaq aningaasaliisoqartarnera aningaasanut inatsimmi aamma ersarippallaanngilaq. Ineriartorneq tamanna ineriartorluarnerunani assigiinngisitsivoq. Naalakkersuisut Inatsisartullu tamanna ilumut angorusuppaat?, Hermann Berthelsen, Ole Dorph aamma Jørgen Wæver Johansen aperipput.