Qeqertaq
S-61-mik ujaasineq kinguneqarluartoq
Inuit marluk, Nuussuaq ituillugu ingerlaarnerminni qamuteralimminnik asererortoortut, ataasinngornermi ujarneqarlutillu helikopterimik aaneqartariaqarsimapput. Ujarneqartut ajunngitsut Qeqertamut apuunneqarsimapput
Qamuteralinnik angallaserlutik inuit marluk Ikerasaniit Nuussuaq ituillugu Qeqertamut sapaammi ingerlaarnerat pilersaarutaasut malillugit inerneqanngilaq, angalasut ujaqqamut apornerminni qamuteralaat angallatigisaat sequmimmata.
Taarsiullugumi inuit taakkua marluk, angut 55-inik ukiulik aamma arnaq 52-inik, Nuussuarmi tiimini aqqalinni pisuttariaqarsimapput piniartut unnuiffigisartagaat illuaq, Ikerasaap Qeqertallu akornanniittoq oqquiffigiartorlugu, ataasinngornermi S-62-imut ilaallutik ujaasisunik nassaarineqarnissamik tungaannut.
Qaasuitsumi politiit angalasut taakkua marluk ilaqutaannit isumaaluttunit sapaammi unnukkut attavigineqarput, angalasummi taakkua marluk Ikerasammiit Qeqertamut sapaammi ualikkut apuunnissartik naatsorsuutigisimagaluarmassuk.
Kisianni Qaasuitsup Politiivini politikommissær, Gedion Qvist, sermitsiaq.AG-mut oqaluttuarpoq politiit sapaammi unnukkut taarsereermat annikitsumillu perlummat ujaasillutik aallarsinnaasimanngitsut.
Ataasinngornermi ullup qeqqanut ujaasiartortut Ilulissaniit aallarput, ujarneqartullu marluk Nuussuarmi piniartarfimmiittut 1 tiimip qaangiunnerani nassaaralugit.