Ruslandip sakkussiornera ernummatigineqartoq
Danskit illersornissaqarfiata russit Sikuiuitsoq Avannarlermi sakkussiornerat piareersarnerat nakkutigeqqissaarniarpaa.
Ruslandip issittumi sakkutooqarfiutiminik ammaqqiillunilu alliliilernera danskinit ernumanartoqartinneqarpoq. Nunanut allanut sillimaniarnermullu politikikkut iliuusissani, nunanut allanut ministerip Anders Samuelsenip saqqummiuteqqammisaani tamanna allaqqavoq.
- Sumiiffimmi nunat politikkikkut soqutigisaqarfiisa ineriartorneri russillu sakkutooqarfiisa allilerneqarneri danskit naalakkersuisuisa malinnaaffigeqqissaarpaat. Illersornissaqarfimmi Naalagaaffiup Paasiniaasui malillugit russit Sikuiuitsoq Avannarliup qeqertaanni sakkutooqarfimminnik ammaaqqillutillu allileripput, timmisartunillu sorsuutinik tikisitsissallutik piareersaaleruttorlutik. Danskit naalakkersuisuisa nunat immallu Issittumiittut sakkulersorfiusussaanngitsutut attakkusukkaluarpaat.
Statsminister Lars Løkke Rasmussen (V) folketingimi sapaatip akunnerata siuliani apeqqarissaarfigineqarami aamma ernumanini ersersippaa. Russit, amerikamiut kinamiullu sumiiffimmi sakkussiornerulernerat statsministerip qanoq isumaqarfigineraa Aaja Chemnitz Larsenip (IA) aperaa.
- Taamaattoqarnera uppernarsarluarsinnaavara, ilaatigut russit sakkussiornerulerput, pingaarnertut – nalilersuinerput malillugu – illersornissami, aammali saassussinissamut periarfissani, statsministeri akivoq.
USA NATO-lu russit sakkussiornerannut qisuariartut
Taamaattoqarneranilu amerikamiut soqutiginninnerulernerat maluginiarneqartariaqarpoq. Soqutiginninnerat septembarimi erserpoq, tassa USA kalaallit mittarfiliornissaannut peqataanissamut soqutiginnilluni nalunaaruteqarmat.
- Taamaattoqarneranilu (russit suliaqarnerat, aaqq.), amerikamiut akuuniarnerulernerat takuneqarsinnaavoq, tamannalu uanga tikilluaqqungaarpara, amerikamiut NATO peqatigalugu uagutsinnut illersuisuummata, statsministerip akissutini ilavaa.
Nunanut allanut illersornissamullu politikkikkut iliuusissat takutippaat, kunngeqarfik NATO-lu qisuariarnissaminnut piareersimasut – oqaloqatigiinnerli siullertut qisuariaataassasoq.
- NATO-p Sikuiuitsoq Avannarleq nakkutigeqqissaarpaa, suleqatigut illersornissamilu peqartigisagut ilangalugit Issittumi Sikuiuitsumilu Avannarlermi malinnaavugut, iliuusissami ersarissumik allaqqavoq.
Lars Løkke Rasmussenip tamanna ima oqaatigaa:
- Isumaqataalluinnarpunga malinnaavigissagigut, pingaartissavarpulli Issittoq sakkulersorfiussanngitsutut inissisimatikkusukkatsigu, taamaattumik Issittumi Siunnersuisoqatigiit peqatigissavagut, tassuunakkummi Rusland oqaloqatigilluartaratsigu.
Kalaallit Nunaata imartaata sikuerukkiartornerata malitsigisaanik imaatigut angallattoqarnerulernerani annaassiniarnissamut atortut imaanilu avatangiisit nakkutiginerulernissaat pisariaqarnerulissasut aamma eqqumaffiginiarneqarput.