pissartanngorniunneq

Rulleskiinik GM-erneq aallartippoq

Nunatsinni pissartanngorniunnerit Nuummi ingerlanneqarput, ajugaasussatullu ilimagineqartut unammillertitik katanniarsarissavaat

Ujakkaartartut timersoqatigiiffiat NSP, rulleskiinik Nunatsinni pissartanngorniunnermik ulluni 22-24 juuli aaqqissuussivoq. Unammiffiusussaq Hans Lyngep Atuarfiata aamma Qinngorpumi Dronningip aqqutaani inissisimavoq.

Angutini inersimasuni Nunatsinni arpattartut sukkanersaat, Martin Møller, ajugaasussatut ilimagineqarpoq, taassumali tunuani Frederik Petersen Ilulissaneersoq aamma Erik Amondsen Nuummeersoq ammasumik unammissangatinneqarput.

Qaannamik pissartaq AWG-milu ajugaasoq
- Erik Amondsen qaannamik unammersuarnermi pissartanngoqqammerpoq. Kisianni inuusuttoq Bjarne Hansen SSP-meersoq immaqa aasaanerani sungiusarluarneruvoq? Bjarne ujakkaarluni Arctic Winter Gamesimi ujaminnatutuatut kuultinnattutut eqqaamaneqarneruvoq, nunanut allanut unammisartunut sungiusaasoq, Øystein Slettemark oqaluttuarpoq.

Arnat unammineranni Niviaq C. Berthelsen NUP-meersoq qaannamik unammersuarnermi angusarissaareernermi kingorna ajugaassangatinneqarpoq. Tassunga unammillertaavoq, Uiloq Slettemark, maanna 50-inik ukioqartoq.

Rulleskeertoqarnerunissaanik siammarsaaneq
Pissartanngorniunnermi takisuumut aalajangersimanngitsumik arpalluni tallimanngornermi unammisoqassaaq. Arfininngornermi klassiskimi ullaap tungaani unammisoqassaaq, ualikkullu sprint stafet unammissutigineqassaaq.

Nunatsinni Sisorartartut Kattuffiata maanna rulleskeerneq sungiusaatitut Nunatsinni unammissutitullu siammarterniarlugu sulissuteqarpoq. Rulleski immaqa aasaanerani sungiusaatini pingaarnersaavoq, Nunatsinnilu rulleskiinik sungiusarnissamut periarfissat amerlapput.

Powered by Labrador CMS