rulleski
Rulleskeerluni GM-ertoqarnerani Martin aamma Ukaleq angusarissaarluartut
Rulliskeerluni GM-ertoqarnerani Martin Møller tupaallaatissaanngitsumik unammisutigisamini tamani sukkanersaavoq. Piukkunnaatillillu arnani angutinilu takutitsilluarput
Ilimagineqareertutut Martin Møller Nunatsinni rulleskeernermi aamma sukkanersaavoq. Martin GM-imi unammeqataaffini sisamasaasut qularutigineqanngitsumik tamaasa ajugaaffigai.
Bjarne Hansenilu 17-nik ukiulik siunissaqarluarpoq, taassuma Martin Møller angujartuaarpaa.
Arnanilu Ukaleq Slettemark 15-nik ukiulik saqqummerluareertutut oqaatigineqarsinnaavoq. Taanna unammeqataaffigisamini sisamani pingasut ajugaaffigai. Taannalu 8 kilometerinut isorartugisumut sukkaniunnermi anaanaminit, Uiloq Slettemarkimit ajugaaffigineqarluni tulliulluni apuuppoq.
Nuummi rulleskeerluni ulluni 14.-18 juli GM-ertoqarnera, ujakkaartartut peqatigiiffianit NSP-mit aaqqissuisuunneqarpoq.
Rulleskeerlunilu GM-ertoqarneranut assigusumik Kalaallit Nunaanni Sisorartartut kattuffiata inuussuttut ulluni 13-20. juli. sungiusartippai. Ujakkaartartulli aqqaneq marluk peqatigiiffinnit NSP, ASP, KS-69 aamma SSP-minngaanneersut sungiusarnermi peqataapput.