rubinit
Rubinnit pillugit innuttaasut ataatsimeeqatigineqassasut
Rubinisiornerup qanoq Qeqertarsuatsiaamut qaqitseqataasinnaava? Qeqertarsuatsiaat katersortarfianni ullumi tallimanngornermi innutaasut ataatsimiisinneqassapput
Innuttaasut tusarneqarniassapput IBA-mut isumaqatigiinniarnerni suut angorusunneraat. Qeqertarsuatsiaat eqqaanni rubinisiornissamik pilersaarusiortoqarpoq.
Innuttaasut ataatsimiisinneqarnerat ullumi tallimanngornermi Qeqertarsuup katersortarfiani nalunaaqutaq 13.00 ingerlanneqassaaq.
Kommuneqarfik Sermersuumi borgmesteri Asii Chemnitz Narup kiisalu Inuussutissarsiornermut, Aatsitassaqarnermut Suliffeqarnermullu Naalakkersuisuisoqarfimmit peqataasoqassaaq.
- Qeqertarsuatsiaarmiut rubininik suliniummut peqataatinneqarnissaat assut pingaartippara. Tamannami suliniutip Kalaallit Nunaanni inuiaqatigiinnut iluaqutaanissaanut qulakkeerissaaq minnerunngitsumillu Qeqertarsuatsiaarmiunut, Inuussutissarsiornermut, Aatsitassaqarnermut Suliffeqarnermullu Naalakkersuisoq Jens-Erik Kirkegaard oqarpoq.
Impact Benefit Agreement, IBA, tassaavoq pingasuulluni isumaqatigiissut, tamannalu Kommuneqarfik Sermersuumit, True North Gemsimit aamma Namminersorlutik Oqartussanit tigussaasunik suliniutinik imaqartinneqarluni isumaqatigiissutigineqassaaq, Kalaallit Nunaanni inuiaqatigiinnut minnerunngitsumillu nunaqarfimmut Qeqertarsuatsiaanut iluaqutaassalluni.