True North Gems

Rubinisiortut ima amerlatigisunik ilinniartoqassapput

Kommuneqarfik Sermersuumi kommunalbestyrelse aamma True North Gems nunaqavissut sulisorineqarnissaat pillugu isumaqatigiissusiorput

Qeqertarsuatsiaat eqqaanni rubinisiornissaq qanilleriangaatsiarpoq

Qeqertarsuatsiaat eqqaanni rubinisiortoqarnissaani aatsitassarsiortitseqatigiiffiup True North Gemsip suliffissat kisiisa pisussaaffiginngilai. Kulturimik suliaqartut aamma aningaasaliiffigineqasssapput. Tamanna erserpoq IBA-mik taaneqartartup True North Gemsip Kommuneqarfik Sermersuullu isumaqatigiissutigimmassuk. IBA-mi isumaqatigiissutip sinaakkuserpaa Qeqertarsuatsiaat eqqaanni Aappaluttumi rubinisiornissami nunaqavissut tungaannut aatsitassarsiortut pisussaaffii.

Ilinniartut
Qeqertarsuatsiaat eqqaanni aatsitassarsiorfissaq ammarnissaminut qanilleriaqqoq. Tunisassiornissamut akuersissut sapaatip akunnera kingulleq Naalakkersuisut tunniuppaat. Maanna tassa IBA-mik isumaqatigiissut Kommuneqarfik Sermersuup akuersissutigaa.

True North Gems pisussaalerpoq aatsitassarsiorfissap suliarinerani sulisut 70 procentiisa nunaqavissuunissaannut aatsitassarsiornerlu aallartilluarpat sulisut 80 procentii nunaqavissuussasut. Atorfiit tamarmik Kommuneqarfik Sermersuup suliffissarsiortarfiatigut inuttassarsiorneqassapput nunaqavissut atorneqarnissaat qulakkeerniarlugu.

- Nuannaarutigaara taama isiornikkut innuttaaqatitsinnut suliffissanik qulakkeerinnissinnaanerput: Sulilersunut kisimi pinnani, inuiaqatigiinnulli tamanut isumalerujussuuvoq, borgmester Asii Chemnitz Narup Inuit Ataqatigiinneersoq oqarpoq.

True North Gems aamma pisussaaffilerneqarpoq sulisut ilinniartitaanerannut ukiut siulliit marluk 250.000 koruunit atorneqassasut tamatumalu kingrna ukiumut 1 millioner koruunit atorneqartassasut. Ilinniartut tallimaatinneqartassapput aammalu nunaqavissut sulianut aalajangersimasunut ilinniartinneqassallutik.

Kulturi taperserpaat
- Qeqertarsuatsiaat eqqaani rubinisiorfik nunatsinni taama ittut siullersaraat. Iluatsillugu nunatta sulisoqarnikkut piiaaffimmut taama ittumut sutigut tamatigut sulisoqarsinnaanera avammut takutissallugu pingaartuuvoq, Asii Chemnitz Narup oqarpoq.

True North Gems aamma kulturimut isumaginninnermullu aningaasaateqarfimmut aallaqqaammut ukiumut 100.000 koruuninik aningaasaliissuteqartassooq taakkulu 250.000 koruuninut amerliartussapput. Aningaasat Qeqertarsuatsiaani sammisassaqartitsinermut atorneqassapput.

Powered by Labrador CMS