Rubinisiorfik nutaalianik nakkutiginninnermi atortoqassaaq

Nunani tamalaani aatsitassarsiorfiit Torontomi saqqummersitsineranni Pdac-imi kalaallinut peqataasunut pakatsinartutut oqaatigineqarsinnaavoq. Saqqummersitsineq ukiunit allanit sanilliullugu pisoqanngiffiuneruvoq, aamma aatsitassarsiornissamut suliaqartut atukkatik pitsaanerulernissaat utaqqimaarpaat.

Taamaakkaluartoq Sulisitsisut Peqatigiiffianit peqataasunit ataasinngornermi nuannersumik nutaarsiassaqarpoq.

Aatsitassarsiorfiit suliffeqarfinnik allanik suleqateqarnermikkut sulineq ingerlanniartarpaat. Suliffeqarfiit aatsitassarsioqatigiiffiit suliarisinnaanngisaat suliarisarlugit. Tamanna ataasinngornermi tusarliunneqarpoq.

True North Gemsimi nalunaaruteqarpoq ISS-ip Kalaallit Nunaanni immikkoortortaqarfia Qeqertarsuatsiaani piiaaffimmi nakkutiginninnermut akisussaasuussasoq. Aamma immikkoortitsinerit suliarisalissavaat.

Nakkutiginninneq nutaaliaasoq
Taamaasilluni ISS aamma Securitasip nakkutilliineq suliarilissavaat. Nakkutilliinermi atortorissaarutit nutaa atorneqassapput. Tassani filmiliutit atorneqassapput. Arlaannik pasinartumik iliortoqassappat kalerrisaarut nammineerluni aallartissinnaalissalluni.

- Nakkutilliinerup qanoq isikkoqarnissaa pillugu ukiup aappaa avillugu suleqatigaagut. Kalaallit Nunaanni suliffeqarfiup suliakkiutip suliarisussaanera nuannaarutigaarput. Nakkutilliineq taamaattoq suliffeqarfinnut assigiinngitsunut aamma neqeroorutigisalersinnaassavaat, pisortap tullia nakkutilliinermilu pisortaq Jens B. Frederiksen oqarpoq. ISS-ip Nuummi suliffeqarfiutini allitittariaqassagaa oqaatigaa.

Qeqertarsuatsiaat eqqaanni piiaaffimmi ungaloqassanngitsoq oqaatigaa. Tikilluaqqusaanngitsunik inunnik eqqaaniittoqarpat nakkutilliinermi atortorissaarutip sulisunut nalunaarutigisassavaa. Tassanngaannit nakkutilliisup inuk tikilluaqqusaanngitsoq qinnuigissavaa sumiiffimmit peeqqullugu. Aamma piiaaffiup eqqaani nakkutilliisoqartuaannassaaq.

Nakkutilliisutut atorfeqartussat misissuinerni aamma suleqataasassapput. Tamanna Nuummi ingerlanneqartassaaq, atorfininniaraannilu akuerineqaqqaartariaqarluni.

Ikiaroorsimanersut imigassartorsimanersulluunniit
Sulisut ikiaroorsimanersut imigassartutorsimanersulluunniit aamma misissorneqartassapput.

- Imersimasunik ikiaroorsimasunilluunniit sulisoqarusunngilagut. Tamanna nakkutilliinermi eqquisinnaavoq, kisianni aamma ikiaroorsimagaanni imigassartutorsimagaanniluunniit tillinnissamut qaninnerusartoq nalilerparput, Jens B. Frederiksen oqarpoq.

Rubinimik piiaaffiup ukiup ingerlanerani aallartinnissaa True North Gemsimit naatsorsuutigineqarpoq. Maannakkut aallartisaanerit ingerlanneqarput.

Pdac-imi Torontomi ingerlanneqartumi Tusagassiivik Sermitsiaq.AG-mit aamma peqataaffigineqarpoq