Aappaluttoq
Rubinisiorfik Kalaallit Nunaannut milliardinik isertitsissutaassaaq
Selskabi True North Gems Greenland rubininik suli tunisassiulinngilaq, Kinamiulli selskabiannik tuniniaanissamik isumaqatigiissuteqareersimavoq
Decembarimi aatsitassarsioqatigiiffiup True North Gems Greenlandip, ulluinnarni TNGG, nunaqarfiup Qeqertarsuatsiaat, Nuummit 160 kilometerinik kujasissusilimmiittup, eqqaani Aappaluttumi nunap qaava piialerpaa, rubineqarfik tikinniarlugu.
Ullumikkut selskabip sanaartornerup naggattaa aallartippaa, suullu tamarmik pissusissamissut ingerlassappata True North Gems Greenland ukioq manna ujaqqanik pinnersaasiassanik Kalaallit Nunaannit avammut tuniniaasalersinnaassaaq.
Suliniutit annikitsut amigaataapput
Saliiffimmik taaneqartumi selskabi saliinermut atortunik ikkussuileruttorpoq, tassanilu saliinermi rubinit aamma pink safirit immikkoortilerneqassapput, taamaasillunilu gråmalm-imik taaneqartoq tunisassiornermilu sinnikut, pinngortitamut uterteqqinneqaqqittassapput.
– Atortussat allat tamarmik maanna naammassereerput naggataajusumillu suliniutit annikitsut aallartippavut, soorlu kappuffiit (stikkontaktit) assigisaallu, aqqusernillu umiarsualivillu ukiuunera qaangiuppat naammassillugit suliarineqassallutik, TNGG-p pisortaa Bent Olsvig Jensen Sermitsiamut oqaluttuarpoq.
Ukiuni qulingiluani atassaaq
TNGG-p pisortaata neriuutigaa selskabi apriilimi rubininik pink safirinillu avammut tuniniaasalereersinnaassasoq.
– 2015-imi marsimi niuernermut pilersaarusiorsimavugut, taassumalu takutippaa piiaaffiup ukiuni qulingiluani ataffissaani akileraarutitigut akitsuutitigullu Kalaallit Nunaannut 930 millioner koruunit missaannik isertitsisinnaassaagut, Bent Olsvig Jensen oqarpoq.
Oqaluttuaq tamaat Sermitsiami nutaami atuaruk, taannalu pisiarisinnaavat uani: