Rubiinisiorfik Kim Kielsenimit pisortatigoortumik ammarneqartoq
Pisortatigoortumik rubiinisiorfik Qeqertarsuatsiaat kangiani Aappaluttumi aammaanersiorneqarmat, aningaasaliisartut najuuffigaat.
Naalakkersuisut siulittaasuata Kim Kielsenip ammaanersiorneq malunnartinniarlugu allunaasaaqqamik aappaluttumik kipisisuuvoq.
- Massuma aallartinniarnera piffissaq sivisooq aningaasarpassuillu atorneqarsimapput. Sulisullu suliaqarsimaqaat, Kim Kielsen, qiuutit tigunnginnerini naatsumik oqalugiarnermini erseqqissaavoq.
Norskit ingerlatsitseqatiffiannit, LNS Greenlandimit, piiaavik pilersinneqarpoq. Ingerlatsitseqatigiiffimmi aqutsisut ammanersiornermi najuupput, pisortaanerulli Rude Nielssonip, ulloq persuarsiorfiusoq oqaatigaa.
- Upperaarput, rubiinit Kalaallit Nunaanneersut nunarsuarmi niueqatigiiffinni immikkuullarissumik tunisaallualerumaartut, Rude Nielsson takkusimasunut paasissutissiivoq.
Taassuma oqalugiarnermini vikingit Hans Egedellu 1721-mi Nuummut tikinnera eqqaavai. Qungujullunilu oqaatigaa taamani Norgep iluatsissimanngimmagu Tunup Avannaata ilaa taaguutiminik taaneqartalersimannginnera.
- Taamaattoq Norge Kalaallit Nunaallu pitsaasumik suleqatigiissapput, taanna oqarpoq.
Aggersarneqasimasut inimi suliarinneqqittarfimmi takornariartinneqarput, tasssani rubiinit suliaqqinneqartarput. Pujornera pilersaarutinik akornusiilaaraluartoq piaavimmut alakkarneqarsinnaasimavoq, tassani atortussiat pilerigineqarluinnartut piiaarneqartarlutik.
Aatsitassalerinermut Naalakkersuisoq, Mute B. Egede, soorunami najuuttunut ilaavoq, Nunatsinnilu piiaaveqaqqilernera taassuma nuannaarutigaa.