Royal Unibrew aamma Timersoqatigiit Kattuffiat isumaqatigiissuteqaqqittut
Isumaqatigiissuteqartoqarneratigut ilaatigut timersortartut kattuffii ukiumut pingasoriarlutik
Royal Unibrewip aamma Timersoqatigiit Kattuffiata akornanni tapiissuteqarnermut aamma suleqatigiinnissamut isumaqatigiissut ukiuni pingasuni atuuttussaavoq. Isumaqatigiissuteqartut tusagassiuutinut nalunaarummi taama ilisimatitsipput.
Ukiumoortumik legatit
Faxe Kondi legatit ileqquusumik agguaanneqartartut isumaqatigiissummi pingaarnerupput, tassani ukiumi sungiusaasutsialak, ukiumi aqutsisutsialak aamma ukiumi timersullammak legatinnatsinneqartarput. Tamatuma saniatigut Faxe Kondi Pulje isumaqatigiissummi amerlanerusunik aningaasalerneqarpoq.
Faxe Kondi Puljenip timersoqatigiiffiit atisanik timersuutinik pisinissamut aningaasanik ukiumut pingasoriarluni Timersoqatigiit Kattuffiat aqqutigalugu qinnuteqarnissaannut periarfissiivoq, kattuffik ilisimatitsivoq.
Timersoqatigiiffinnut aningaasat amerlanerusut
- Isumaqatigiissut nuannaarutigisorujussuuarput, timersoqatigiiffimmut toqqaannartumik aningaasanik amerlanerusunik tunniussissammat. Faxe Kondi Pulje timersoqatigiiffinnut tamanut atisanik timersuutinik tapiiffigineqarnissamut periarfissatsialaavoq, Timersoqatigiiffiit Kattuffianni siulittaasoq, Nuka Kleemann, oqarpoq.
Jørgen-Anker Ipsen Royal Unibrewimeersup isumaqatigiissut nutaaq aamma nuannaarutigaa:
- Timersoqatigiit Kattuffiannik isumaqatigiissut Royal Unibrewip oqaluttuarisaanerani tapersiilluni isumaqatigiissutini sivisunerpaavoq, Kalaallit Nunaannilu timersornermut suli tapersersueqataasinnaagatta tulluusimaarutigisorujussuuarput.
Timersoqatigiit Kattuffiata aamma isumaqatigiissutaanni tamanna sivisunerpaasoq, Nuka Kleemannip ilisimatitsissutigaa.
Faxe Kondip aamma Timersoqatigiit Kattuffiata isumaqatigiissutaat 2019-imi, 2020-imi aamma 2021-imilu atuutissaaq.