Royal Greenlandip siuariartornini ingerlatiinnarpaa

Royal Greenlandip ukiumoortumik nalunaarut pitsaanerpaaq angoqqippaat.

Suliffeqarfik Namminersorlutik Oqartussanit pigineqartoq, ukiumi 2014/15-imi naatsorsuiffiussumi akileraannginnermi 204 millionit koruuninik sinneqartooruteqarpoq.

Ukiut tallimat tulleriit ingerlaneranni pingaarnertut aallussatigut ataqatigiilluinnartumik ineriartorneq pisoq sinneqartooruteqarfiulluartorlu, Nunatsinni suliffeqarfiit annersaata anguaa.

Aamma atuaruk: Thinghuus canadamiunut eqqissisaavoq: Uagut pitsaanerpaavugut

Pisortaq naammagisimaarinnittoq
Kalaallit Nunaanni ukioq manna ukiukkut sivisuumik annertuumillu sikuunera pissutigalugu ingerlatsinerup tungaatigut annertuunik akimmisaarfeqarpoq, tamannalu ingerlatsinikkut aningaasartuutit annertuseriarujussuarnerannik, aalisarnissamut pilersaarutinik allannguinernik, tunisassiorfinnik matusigallartariaqarnernik kiisalu assartugalerinerup tungaatigut aasap ingerlanerani akimmiffeqarneranik kinguneqarpoq.

Ingammik kingullertut taaneqartoq Royal Greenlandip pingaarnertut aallutaasa ilaannut, qaleralinnut, ajornartorsiortitsiffiusimavoq.

- Ukiorluusimagaluartoq angusaqarluarnerput naammagisimaartorujussuuarput. Ukiorluullunilu ukiuunera sivisuvoq, tamatumanilu ingammik avannaani qaleralinnik tunitsiviit tunisassiorfiillu sunnigaasimapput. Aalisakkat ukiup naatsorsuiffiup naannginnerani tuninissaannut qerititsiviit uninngasuutiviutigisut suli piffissaatillugu imaarsinnaasimanngilavut, tamannalu pisisartutsinnut aallisakkanik piserusukkaluartunut sunniuteqarpoq, imaarsigamagaluarutsigillu angusavut amerlanerusimassagaluarput, Royal Greenlandimi pisortaaneq Mikael Thinghuus, tusagassiorfinnut nalunaarummi oqarpoq.

Nammineq pigisat amerleriartut
Akileraareernermi angusat 113 millionit koruuniupput namminerlu pigisat 1,3 milliardit koruuniullutik, taamaalilluni Royal Greenland aningaasatigut patajaatsumik inissisimavoq. Nammineq pigisat 1.264 miollionit koruuninngorlutik amerleriarput, ingerlatseqatigiiffiullu patajaassusaa suli 33 procentiuvoq.

Agguagarsiassat pillugit politikki naapertorlugu ukiumut angusanit iluanaarutinik agguaanissamut 57 millionit koruuninik immikkoortitsisoqarpoq, taakkualu ukiumut angusat 50 procenteraat.

Sulisut amerlanerulertut
Suliffeqarfissuarlu amerlanerusunik sulisoqalerpoq. Tassami agguaqatigiisillugit 2.156-inik 2014/15-imi sulisoqarpoq. Tassa sulisut 13 procentimik amerleriarsimapput, tamatumanilu Kalaallit Nunaanni sulisut amerleriarujussuarnerat pissutaavoq.

Kalaallit Nunaanni tunisassiorfiit aallussaqarnerulernerisa kiisalu Upernavik Seafood A/S-ip pisiarineqarnerata kingunerisaanik Kalaallit Nunaanni sulisut 23 prcentinik amerleriarput, sulisullu Nuummi qullersaqarfimmi, nunami tunisassiorfinni tunitsivinnilu 37-usuni kiisalu kilisaatit tunisassiorfiini aalisariutinilu mikisuni sulisuusut agguaqatigiisillugit 1.202-jupput.

Kalaallit Nunaanni sulisut ukiut sisamat kingulliit ingerlaneranni 50 procentimik imaluunniit 400-nit amerlanerusunik amerleriarsimaspput.

Atuaruk: Royal Greenlandip canadami unammillertini pisiaraa