sanaartorneq

Royal Greenlandip Nuummi ingerlatani ataatsimuulersikkusuppai

Royal Greenlandip illoqarfimmi ingerlatani qitiusumik allaffiup tinitsiviulli eqqaani, ataatsimuulersitsissinnaanerlugit misissuiffingaa.

Royal Greenlands hovedkontor og fabrik i den gamle fiskerihavn i Nuuk.

Taamaasilluni umiarsualivittaap tunuani Royal Arctic Linep atorsimasaani tunitsivimmik qitiusumillu allaffiliortitsinissamik pilersaarutaasimasoq, taamaatinneqarpoq.

Suliniut kinguartinneqartoq

- Sanaartortitsinermut – kuuffilersuinerit ilanngullugit – umiarsualiviinermulli aningaasartuutissat akisuallaartut takusinnaangatsigit, suliniutip kinguartinneqarnissaa aalajangiupparput. Umiarsualivik immerneqangaatsiarlertussaavoq angallatillu tulallutik tunisisinnaasariaqarlutik, Jens K. Lyberth Royal Greenlandimeersoq, Sermitsiaq.AG-mut nassuiaavoq.

Royal Greeland suliffeqarfiit sisamat suleqatigalugit umiarsualivittaap tunuani nutaanik sanaartortitsiniaraluarpoq, qularnartoqarpallaarnerali, atortulersuinissallu akisuallaassanera, suliniutip ingerlanerani aalisakkerivimmit paasineqarpoq.

Tunitsiviup pioreersup allilerneqarnera

Royal Greenlandilli umiarsualivitoqqami illuutit pioreersut tamakkiisumik aaqqiissutissatut atorneqaannarsinnaanersut misissuiffigaa.

- Qanoq pisoqarumaarnera suli aalajanginngilarput, siunissamili pisariaqartitatsinnik naammassinnissinnaasumik tunitsiviup pioreersup allilerneqarsinnaanera eqqarsaatersuutigisimavarput, Jens K. Lyberth oqaluttuarpoq.

Royal Greelandip aalisakkerivimmik Maniitsumisuulli ittumik pisariaqartitsivoq, tassani aalisakkat uumatillugit tulaanneqartarput aalisakkerivimmilu aatsaat toqorarneqarlutillu pitsanngorsarneqartarlutik.

Ingerlatat katersornissaat

Illoqarfimmi ingerlatat katersorneqarnissaat, siunertaavoq. Qanittukkut Royal Greenlandip toqqorsivitoqaq Royal Arctic Linemit atorneqarsimasoq, attartulerpaa.

Suliffeqarfik sanaartortitsinissamut pilersaarutinik suli aalajangiisimannginnera, Jens K. Lyberthip naqissuserpaa.

Powered by Labrador CMS