Kangersuatsiaq
Royal Greenlandip KNAPK-llu nunaqarfik ornikkusunngikkaat
KNAPK, Royal Greenland aamma SIK Upernaviup eqqaani nunaqarfinnut angalanermut atatillugu Kangersuatsiami innuttaasut oqaloqateqarnissaminnik pisariaqartitseqisut orninngilaat. Angalaqatigiit nunaqarfik avaqqutiinnarpaat – tamannalu aalisartut piniartullu peqatigiiffiannit aamma nunaqarfimmi aqutsisunit annertuumik pakatsissutigineqarpoq
Kangersuatsiami aalisakkerivik, siornatigut Upernavik Seafoodimit pigineqartoq, imeqarniarnikkut ajornartorsiuteqarneq pissutigalugu 2011-mili matoqqavoq.
Nunaqarfimmi aalisarneq pingaarnertut inuussutissarsiutaavoq. Tamaattumillu nunaqarfimmi aqutsisut aamma Kangersuatsiami Aalisartut Piniartullu Peqatigiiffiata, KAPP-ip naliliinerat malillugu, tunitsivissaqannginneq inuuttaasunut 170-it missaanniittunut annertuumik kingunerluppoq.
Royal Greenlandip aalisakkerivik Upernavik Seafoodimiit siorna novembarimi pisiaraa.
Suliffeqarfiulli siuttuisa aalajangiuppaat aalisakkerivik ammarneqaqqissanngitsoq.
Taamaattumik aalisakkeriviup tunineqarnissaa pillugu kalaaleq namminersortoq maanna isumaqatigiiniarfigineqarpoq. Aalisakkerivimmik pisiniarluni soqutiginnitsoq siusinnerusukkut nalunaarpoq, aalisakkeriviup saarullinnik panertiterinermik suliaqarfissatut aappaagu aasaanerani ammarnissaa naatsorsuutigingini.
Pakatsineq
KAPP-mi ilaasortat aamma nunaqarfimmi aqutsisut KNAPK-p aamma Royal Greenlandip siuttui aalisakkerivimmik takuniaareerlutik nunaqarfik avaqqutiinnarlugu ingerlammata pakatsisimaqalutik isiginnaaginnartariaqarput.
Aalisakkerivik aserfallassimasoq qimaannarneqarsimasoq takuneqarsinnaavoq – tassami matut ilaatigut aseqqukkut ammaannarput, allaffimmilu atortut pappiaqqallu qimaannarneqarsimallutik.
Allaaserineqartoq aviisimi Tamanut Avannaanimi tamaat atuarneqarsinnaavoq. Aviisi tamakkiisoq ataani akeqanngitsumik aaneqarsinnaavoq: