Aalisarneq
Royal Greenlandip avannaani nunaqarfik qimattussanngoraa
Royal Greenland Kangersuatsiami tunitsivimmut imermik amigaateqarneq pissutigalugu 2011-mili matoqqasimasumut aningaasaleeqqissanngilaq. Kisiannili kalaallip namminersortup tunitsiviup ammaqqinneqarnissaa qulakkiissagunarpaa
Kangersuatsiami aalisarnermik inuussutissarsiuteqarneq pingaarpaavoq.
Taamaakkaluartoq nunaqarfimmi aalisartut pisaminnik ukiut kingulliit sisamat missaanni tunisisinnaasimanngillat. Kangersuatsiami Aalisartut Piniartullu Peqatigiiffiat, K.A.P.P, aamma nunaqarfimmi aqutsisut, piffissaq kingulleq tikillugu tunitsiviup nunaqarfimmiunit ingerlanneqalersinnaanera neriuutigisimagaluarpaat.
Taakkumi siusinnerusukkut tunitsiviup nunaqarfimmiunit tiguneqarsinnaanera siunertaralugu Royal Greenlandimut aamma Naalakkersuisunut arlaleriarlutik allagaqaateqartarsimagaluarput – kinguneqanngitsumilli. Neriunnerli tamaanga killeqarpoq.
Tunitsivik pisiarerusunneqartoq
Tassami Royal Greenland aalajangerpoq Kangersuatsiaq qimanniarlugu. Taama aalajangerneq nunaqarfimmi innuttaasunut 170-it missaanniittunut siunissamut ernumalersitsivoq. Kisiannili Royal Greenlandimit namminersortoq aalisarnermik ingerlataqartoq, Hans Mathiassen, Tasiilami najugaqartoq, tunitsivimmik pisinissaq siunertaralugu juunimili Royal Greenlandimit oqaloqatigineqartalerpoq.
Hans Mathiassenip, Tasiilami suliaqarnini pissutigalugu najuqarallartup, suiffeqarfiit Arctic Waven aamma Greenland Fish Offshore pilersitseqataaffigalugillu piginneqataaffigai. Taassuma Kangersuatsiami tunitsiviup ukiup naannginnerani pisiareersimanissaa naatsorsuutigaa, neriuutigalugulu tunitsivik aappaagu aasakkut saarullinnik tunitsivigineqarsinnaalerumaartoq.
Taamaakkaluartoq Kangersuatsiami aalisartut suli sivisuumik tunitsivissaqanngikkallartut, ilaatigut 200 kilometerit angullugit aalisarfissaminnut tunitsivissaminnullu ingerlasariaqartarput.
Allaaserineqartoq tamaat aviisimi Tamanut Avannaanimi atuarneqarsinnaavoq. Qaasuitsup Kommuniani pisartut assigiinngitsut aviisimi aamma atuarneqarsinnaapput. Aviisi akeqanngitsumik ataani aaneqarsinnaavoq: