Royal Greenlandip angusaasa siorna angusat amerlaqatigaat

- Ukiup affaani siullermi angusaq pitsaasoq.

Royal Greenlandimit ataatsimut isigalugu inerniliineq taama nipeqarpoq, sisamanngornermi ukiup qiteqqunnerani nalunaarusiaq saqqummiunneqarpoq.

Angusat akileraannginnermi 85 millionit koruuniupput, angusallu procentinngortikkaanni 3,3 procentimik siornamut sanilliullugu pitsanngoriarput.

Atuaruk: Royal Greenlandip siuariartornini ingerlatiinnarpaa

Kangiani niuerneq nukittooq
Angusat ataatsimut isigalugu pingaarnertut aallussanik raajanik qalipalinnik qaleralinnillu tunngaveqarput, siulersuisuni siulittaasoq Niels Harald de Coninck-Smith erseqqissaavoq.

- Raajanik ukiup affaata siulliani kilisanneq ingerlalluarlunilu pisaqarluarfiulluarpoq, Kangianilu niuernermik ingerlatsinerup patajaalluinnarnera taamatuttaaq Ruslandimi piffissap niuermik ingerlatsiffiusartup aallartilluarnera pissutigalugit raajat qalipallit tungaatigut angusat siorna angusanut sanilliullugit malunnartumik pitsaanerupput, taanna ukiup qiteqqunnerani nalunaarusiami oqarpoq.

Taamatuttaaq qalerallinnik niueruteqarneq ineriartorluarpoq - Kangianilu niuerfinni tunisaqartarnerup aamma tungaatigut.

Atuaruk: Royal Greenland Asiami ingerlalluarpoq

Canadami nalorninartoq
Kisianni pingaarnertut niuerutigineqartartut; raajat uutat qalipaajakkallu, tunisinermi akit tungaatigut akigissaarnerpaasartut, siornatulli tunisaalluartiginngillat.

- Taakkuninnga niueruteqarneq Canadami pisassiissutigineqartussat annertussusissaat pillugit nalornisoqarnera pissutigalugu ingammik qaammatini pingasuni kingullerni malinnaavigiuminaassimavoq.

- Canadami pisassiissutigineqartussat annertussusissaasa aalajangerneqarnissaat juunimut kinguartinneqarpoq, pisassiissutigineqartussalli 20-40 procentimik annikillineqassasut ilimagineqarmat raajanik uutanik qalipaajakkanillu niueruteqarneq patajaannerusumik ineriartoqqissangatinneqarpoq, Niels Harald de Coninck-Smith oqarpoq.

Suliffeqarfimmit tunisat procentinik sisamanik annikilleriarput.

Angusarissaarnerunissaq anguniaraa
Royal Greenland akileraannginnermi 204 millionit koruuninik sinneqartooruteqartoq, ukioq manna angusarissaarnerunissani anguniarpaa.

Kisianni raajanik uutanik qalipaajakkanillu niuerneq nalorninartortaqarnerpaavoq, nunatsinni suliffeqarfiit annersata ilisimatitsivoq.

Atuaruk: Royal Greenland pisortat aningaasaateqarfiinut 172 millionit koruuninik akiliuteqarsimavoq