naapeqatigiinneq
Royal Greenland: Ilinniartut imminnut ingerlatsivillu pillugit ilinniarput
Ilinniartut 14-it 19-iniit 40-nut ukiullit ilinniartut Kangerlussuarmi naapisimaarneranni paasisaqarluarput
Royal Greenlandip Kangerlussuarmi ilinniartuminik naapisimaaqatigiissitsinera ima ingerlalluartigaaq ukiut tamaasa ingerlanneqartalissallluni, taamatut selskabip nittartagaatigut tusagassiorfinnut nalunaarutikkut paasissutissiivoq attaveqaqatigiinnermut pisortaq Káte Hansen.
Ilinniartunut pitsaasuusimavoq ilinniartut allat naapillugit. Ataatsimoorlutik periarfissaqarsimapput oqaloqatigiissutigissallugu ataatsimut naleqartitaqarneq qanoq pingaaruteqartigisoq, Káte Hansen ilinniartut ulluni sisamani naapisimaarnerat pillugu oqarpoq, tassanilu aamma sammisat assigiinngitsut ulluinnarnilu suliassat nukersornartut oqaloqatigiissutigineqarput. Ilinniartut misigisimapput ullut sisamat taakku sukkavallaamik ingerlasimasut, taanna paasissutissiivoq.
– Ilinniartut naapisimaarnerat ilinniartut ilarpaaluinut isinik ammaavoq. Nuanneqaaq takullugu ilaasa paasigaat inuunermik pitsaanerusumik piumalluni ileqqut pitsaanngitsut ilaat nammineq allanngortinniartariaqartut. Ilinniartup ataatsip paasivaa ileqquni pitsaanngitsut peroriartornermini ilinniarsimasani qaangertariaqarlugit, allap inortuisarnini iliuuseqarfiginiarpaa, alla nassuerpoq internetti pinngitsoorsinnaanagu, HR konsulent Esther Arens tusagassiorfinnut nalunaarutikkut oqarpoq.
Ilinniartut paasivaat Royal Greenland nunarsuarmi tamarmi ingerlatsivittut paasissallugu qanoq pingaaruteqartigisoq. Pingaartumik peqataasut nuannaarutigaat ingerlatsiviup periusissatut pilersaarutaanik paasinnikkamik, Káte Hansen oqarpoq.
Aasaq manna aamma gymnasiami ilinniartut Kangerlussuarmi summer school-erput.