pikkorissaanerit
Royal Greenlandi sulisuminik pikkorissaanermini aningaasanik sipaaruteqalissaaq
Royal Greenland sinerissami tunisassiorfiini sulisui qulingiluat maskiinanik tisaatinik iluarsartuussisalernissaannik pikkorissartippaat
Royal Greenlandip tunisassiorfiini Paamiuni, Maniitsumi, Kangaatsiami, Sisimiuni Qasigiannguanilu sulisut aalajangersimasut maskiinanik tisaatinik aqqissuisinnaanermut pikkorissareernerisigut makiinalerisunik nunanit allaneersunik tikisitseqqaanngikkaluarlutik namminneerlutik tisaatit ajortippata aaqqissorsinnaanngorpaat
Royal Greenland nittartakkamini paasissutissiivoq.
Sapaatit akunneranut 50.000 koruunit
- Tunisassiorfinni pineqartuni maskiinamik tisaammik baadermaskiinamik taasartagaannik peqarput, taakkulu maskiinat ajortikkaangata tamatigut Polenimiit Norgemiilluunniit maskiinalerisumik Royal Greenlandi tikisitsisarpoq. Tikisitsineq sapaatip akunneranut 50.000 koruunit tikillugit naleqartarpoq. Maskiinalerisunik tikisitsisarneq ukiumut arlaleriarluni pisartoq maanna sulisut pikkorissarsimalersut namminneq aaqqissuisinnaalernerisigut pisariaaruppoq, Royal Greenlandimi sulisoqarnermi siunnersorti Adolf Egede oqarpoq.
Polenimi pikkorissartut
Royal Greenlandi paasissutissiivoq, sulisut qulingiluat maskiinamik tisaammik ingutserisinnaanermik ikkussuisinnaanermillu katillugu ulluni aqqaneq-marlunnik sivisussuseqartumik inuit marluk-pingasukkaarlutik 2017-imi februaarimiit aggutusi ilanngullugu Polenimi pikkorissartinneqartut.
- Maannamut inuit arfineq-marluk pikkorissarneqareerlutik naammassisimalereerput. Pikkorissartut kingulliit marluk Polenimi ulluni makkuani pikkorissarnertik naammassissavaat. Pikkorissartut tamarmik naammassippata inuit qulingiluat maskiinamik tisaammik ingutserisinnaanermik ikkussuisinnaanermullu piginnaaneqalissapput, Adolf Egede royalgreenland.gl-mut oqarpoq.