Royal Greenland: Annertuumik suliniuteqalerpoq

Royal Greenlandip aalisarfiusartuni nungusaataanngitsumik qaleralinniartoqartalernissaa anguniarlugu suliniummik pilersitsivoq. Suliniut iluatsissappat sinerissap qanittuani qaleralinniarnermi pisat MSC-mik allagartalersorneqalissapput.

Pisortaaneup Mikael Thinghuusip Katuami CSR Greenland ataatsimeersuarnerani tallimanngormat oqaatigaa, ”Nungusaataanngitsumik aalisarneq pillugu suliniut – Qaleraleralinniarfiusartumik ukkassineq”-mik taaneqartoq - pilersinneqarsimasoq.

Qanoq iliortoqassava?

- Sinerissap qanittuani nungusaataanngitsumik qaleralinniartoqartalernissaata anguneqarnissaa tunngaviusumik kissaatigaarput. Siunissaq ungasinnerusoq eqqarsaatigalugu sinerissap qanittuani qaleralinniartarfiusumi tamarmi ilaannaaniluunniit qaleralittat MSC-mit akuerisaappata pitsaanerpaassaaq. Ilisimatitsissutigineqareersutut maanna qaleralittarineqartartut ukiut tallimat qulillu matuma siorna qaleralittarineqartartunut sanilliullugit mikinerungaatsiarmata sinerissap qanittuani - ingammik Qeqertarsuup Tunuata imartaani - qaleralinniarneq ajoraluartumik kipiluttunartorujussuarmik ingerlavoq. Tamatuma qaleralinniarfiusartuni allani atuutilernissaa pinaveersaartikkusupparput. Taamaammaat nungusaataanngitsumik qaleralinniartoqartalernissaa tamatumalu kingunerisaanik sinerissap qanittuani qaleralittat MSC-mit neriuginartumik ukiut marluk-pingsut-sisamat qaangiuppata akuerisaasimanissaat qulakkeerumallugit aalisarnerup tungaatigut aqutsinermi sutigut pitsanngorsaasoqassanersoq najukkani assigiinngitsuni aalisartut, Pinngortitaleriffik KNAPK-lu suleqatigalugit paasiniassavarput, Royal Greenlandimi pisortaaneq Mikael Thinghuus oqarpoq.

MCS-mik akuersissutip piumasaqaataaleraluttuinnarnera

Taassuma paasissutissiaraa, MSC-mik akuersissut asiami atuisartunit piumasaqaataaleraluttuinnartoq.

- Taamaattumik qalerallit tunisassiarisartakkavut MSC-mit akuerisaanngippata akii piffissap ingerlanerani appassapput tuniuminaassissallutilluunniit, Mikael Thinghuus oqarpoq.

Suliniut aalisarfimmut sorlermi ingerlanneqassanersoq Royal Greenlandip suli aalajangiutinngilaa, ilimanarporli Uummannami Upernavimmiluunniit ingerlanneqassasoq.

Powered by Labrador CMS