Skip to main content

Royal Greenland: Aningaasaliissut aatsaat taama annertutigisoq singinneqarpoq

Aningaasaliissutaasut annerpaataasup 700 millionit koruunilik siulleq, kilisaatinit nutaaliaasunit marluusunit siulleq, pingasunngornermi umiarsuarnut tinutitittarfimmit Bilbaoimi amutsivimmit sisutinneqarpoq.

Spaniami illoqarfimmi umiarsualiveqarfimmi pisoq pingasunngormat ualikkut filmiliarineqarpoq, akunnerillu arlaqanngitsut qaangiummataa Royal Greenlandip Nuummi qullersaqarfiata kantiinaani ataatsimeersuartoqarnerani tv-ikkut saqqummiunneqarpoq.

Pisortaq tulluusimaartoq

Pisortaanerup tulluusimaartup, Mikael Thinghuusip, singitsineq saqqummiuppaa, aningaasaliinerup suliffeqqarfiup aningaasarissaarnera aamma takutimmagu.

Royal Greenlandip siulersuisuini siulittaasoq Niels de Coninck-Smithip siulittaasup nalunaarutaani – Naalakkersuisut siulittaasuannut, Kim Kielsenimut – saaffiginnittumik oqaaseqarnissaminut nipangersimaannanngilaq, tassa kilisaatit taakku nutaat suliassaqarnissaat neriuutigineqartariaqartoq oqarluni.

- Tunisassiassanik pisassagut pigiinnarsinnaagutsigit, taamaalillutalu umiarsuit taakku annertuumik aalisarsinnaallutillu tunisassiorsinnaassusillit atorluarlugit, una aningaasaliineq Royal Greenlandip isertitaani ukiorpassuarni qitiusinnaavoq. Taamaalillunilu suliffeqarfiup pitsaasumik Namminersorlutik Oqartussat aningaasaqarnerannut tapiissuteqarnissaanut periarfissat pitsanngoriassapput, inuiaqatigiinnut tamanut iluaqutaasumik, siulittaasoq oqarpoq, imatullu aarlerisaaruteqarluni: 

Kigaaqutaasoq 

- Akerlianik piumasaqaatit aalajangikkamut muminganik pissappata, suliffeqarfimmut aamma piginnittuanut imaannaanngitsumik kigaalaqutaassaaq.

Oqaaseqaat aalisarnermut inatsimmut erseqqissumik tunngassuteqartoq, tassani politikkikkut Nunatsinni ingerlatseqatigiiffinni angisuuni pisassiissutit annikillisinneqarnissaat kissaatigneqarpoq, taamaalilluni aalisartut amerlanerusut immap pissarititaanik pissarsisinnaaniassammata.

Angusat 129 millionit koruunit

Naatsorsuutit sapaatip-akunneri arlallit matuma siorna nassiunneqarput, 129 millionit koruuninillu angusaqarnermik takutitsipput, kaaviiaartitallu qaffakkiartortut 5,6 milliardit koruuniullutik.

Mikael Thinghusuusip ukiumut nalunaarummit annertuumit ataasiakkaat ukkatarissallugit aalajangerpoq. Naak Asiami, USA-mi aamma Tuluit Nunaanni aningaasat nalingi pitsaannginneruleraluartut, Asiami niuerfiit ilaatigut aallutarineqarnissaat sooq taama pingaaruteqartiginersoq nassuiarpaa, aningaasallu nalingini allanngortoqanngikkaluarpat isertitat 80 millionit koruuninik qaffariartitsissimassagaluartut.

Kinami aalisakkanik kinguppannillu atuineq ukiut ingerlanerini annertuumik qaffariarpoq, Royal Greenlandilu Japanimi niuernermi iluatsitsivoq.

Suliffeqarfiup tunisassiat umiarsuarmik avalaanneqannginnerini maani nunatsinni pitsanngorsarneqartarnerisa annertusarneqarnissaat nanginniarpaa.

Kielsen: Tulluusimaassaagut

Kim Kielsenip piginnittut, kalaallit inuiaqatigiit sinnerlugit peqataasup, ukiuni kingullerni naatsorsuutinut sulinermullu kusanartunut suliffeqarfik qujaffigaa.

- Angusap tulluusimaarutiginissaanut pissutissaqarpoq. Tamatta suliffeqarfimmiittut aamma suliffeqarfiup avataaniittut, Kim Kielsen oqarpoq, taassuma aamma Royal Greenlandip nunarsuami inuiaqatigiinni Kalaallit Nunaat nunarsuup assingani ilaatitsinera pingaartippaa.

Aalisarnermut akitsuutit qaffanneqartut

Ukioq manna angusat taama kusanartigiunnanngitsut ilisimatitsissutigineqarpoq, kisianni suliffeqarfik 2017-imi aalisarnermut akitsuutitigut 113 millionit koruuninik tunniussisoq, ukioq manna taakku 150 millionit koruuninut amerleriarnissaat naatsorsuutigineqarpoq.

Siulersuisunut ilaasortat tamarmik ataatsimeersuarnermi qinigaaqqipput.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER