Royal Greenland piujuaannartitsinererusuppoq

Namminersorlutik Oqartussat aalisakkeriviutaat Naalagaaffiit Peqatigiit anguniagaat tunngavigalugit pilersaarusiukkamik ingerlatsilissaaq

Royal Greenland suliniummik suliffeqarfiit ingerlatsinerannik Naalagaaffiit Peqatigiit nunarsuarmi piujuartitsinermik ineriartortitsineq pillugu 2030 qaangiutsinnagu anguniagaat 17-iusut tunngavigalugit patajaallisaanermut iluaqutaasussamik Danmarkimi suliffeqarfiit 20-t peqatigalugit ingerlatseqataavoq. Suliffeqarfik nittartakkamini taama paasissutissiivoq.

-Neriuppugut suliniummik ingerlatseqataanitsigut Naalagaaffiit Peqatigiit nunarsuarmi anguniagaat tunngavigalugit piujuartitsinermut tunngasunik aallussaqarnerput annertunerulissasoq, taamaalillutami suliffeqarfittut inuiaqatigiinnut akuuffigisatsinnut iluaqutaasumik niuernikkut inerisaanikkullu sunniuteqarsinnaassagatta, Lisbeth Due Schönemann-Paul oqarpoq.

Royal Greenland suliniummik ingerlatseqataanermigut suliffeqarfinni angisuuni mikisunilu sulisut isummersoqatigiinneranni isumassarsioqatigiinnerannilu peqataanissaminut suliffeqarfinnilu taakkunani sulisunik atassuteqalernissaminut periarfissaqalerpoq, taakkulu suliffeqarfiup nunarsuarmi anguniakkat tunngavigalugit pilersaarusiukkamik anguniagaqarnikkut ingerlatsilernissaanut qulakkeerinnittuussapput.

Piujuaannartitsinermik tunngaveqartumik aalisarneq

Suliniummi tunngavik immikkut ittoq ukkatarineqassaaq. Taanna Royal Greenlandimi niuernermik ingerlatsinermi aamma nunarsuarmi anguniakkat tunngavigalugit isumassarsiniarnermi tunngavigineqassaaq.

Suliniut “Ajunngitsuliornermiit niuernermik ingerlatsinermut” apriili 2018-imi aallarnerneqartoq novembari 2019-imi inaarsarneqassaaq. Suliniut Dansk Industrip nittartakkatigut siammarterivigisartagai aqqutigalugit piffissap ingerlanerani aamma nunarsuarmi anguniakkat pillugit ataatsimeersuartitsinerani ukiut tamaasa ingerlanneqartartumi nittarsaanneqarlunilunilu saqqummiunneqartassaaq.

Suliniut Dansk Industrimit pilersinneqarpoq, Danmarkimilu Industriens Fondimit aningaasalersorneqarpoq. Suliffeqarfiit nunarsuarmi kikkulluunniit iluaqutigisinnaasaannik piujuartitsineq tunngavigalugu nutaanik ineriartortitsinissaminnut isumassarsitinneqartarnissaat kajumissaarneqartarnissaallu siunertaavoq.

Nunarsuarmi anguniakkat 17-iusut, anguniakkat ilaat 169-iusut takussutissiallu nittartakkami uani alakkarneqarsinnaapput

Powered by Labrador CMS