tunisassiorfiit
Royal Greenland pilertornerusumik sulisussarsiortalerpoq
Royal Greenlandip tunisassiorfii arlallit nunaqarfinneersunik illoqarfinneersunilluunniit sulisussarsiortarput.
Sulisussarsiortarnerup oqinnerusumik ingerlanneqartalernissaa anguniarlugu ulapaarfimmi sulisussanik sulisussarsiortarnerup tungaatigut allaffissornermi suliassat kommunenit siornatigut ingerlanneqartartut Royal Greenlandimi sulisoqarnermut immikkoortortamit 2016-imi akisussaaffgineqalerput.
Royal Greenland nittartakkamini taama allaaserisaqarpoq.
Royal Greenlandip sulisussarsiortarnerup tungaatigut allaffissornermi suliassat akisussaaffigilermagit ulapaarfimmi sulisussanik sulisussarsiortarneq pilertornerulerpoq, tunisassiorfimmilu sulisut 23-t Avannaani nunaqarfinni illoqarfinnilu assigiinngitsuni maanna ulapaarfimmi sulisuupput
- Suliassat kommunemit siornatigut ingerlanneqartartut akisussaaffigileratsigilli illoqarfinneersunik nunaqarfinneersunillu sulisussarsiortarneq pilertornerulerpoq. Sulisussarsiortarneq pilertornerulermat ulapaarfimmi sulisussat 23-t, taakkunannga sisamat Tunumi nunaqarfinneersut, angalanissaat sulisoqarnermut immikkoortortami sulisunit ukioq manna aaqqissuunneqarput, Royal Greenlandimi sulisoqarnermi allaffissornermut aqutsisoq Svend Larsen, RG.gl-imut oqarpoq.
Ulapaarfimmi sulisut aqqanillit Kullorsuarmeersut Royal Greenlandip Ikerasammi Ukkusissanilu tunitsiviini ukioq manna sulipput, massa ulapaarfimmi sulisut allat Aasianneersut, Qeqertarsuarmeersut kiisalu nunaqarfinnit allaneersut Royal Greenlandip Qeqertami tunitsiviani sulisut. Ulapaarfimmi sulisut allat, taakkunannga sisamat Tasiilap nunaqarfianeersut, Royal Greenlandip Upernaviup nunaqarfiisa tunitsiviini sulipput.
- Ukioq manna ulapaarfimmi sulisussanik Tunumiit Kommuneqarfik Sermersooq suleqatigalugu suliartortitsivugut. Taakku Royal Greenlandip Upernaviup nunaqarfiisa tunitsiviini arlaliusuni maanna sulipput, Svend Larsen oqarpoq.
Royal Greenlandip tunisassiorfiini tunitsiviinilu ulapaarfimmi sulisussanik sulisussarsiortarneq ukiorpassuanngortuni ingerlanneqalereersoq ilisimatitsissutigineqarpoq. Taamaammat Royal Greenland ulapaarfimmi sulisartut illusisimaffissaannik ukiut ingerlaneranni illusiortortarpoq.
Royal Greenlandimi ulapaarfimmi sulisut angalanerat Namminersorlutik Oqartussat nuttartarnermut aningaasaateqarfiannit akilerneqartarput, massa illusisimaffissaqarnissaat Royal Greenlandimit isumagineqartartoq.
Ulapaarfimmi sulisut Namminersorlutik Oqartussat nuttartarnermut aningaasaateqarfiat aqqutigalugu isumaqatigiissusioraangata isumaqatigiissut qaammatini arfinilinni atuuttussaq atsiortarpaat.