Qaleralinnut akitsuut
Royal Greenland naapertuilluanngitsumik unammillertutut pasillerneqartoq
– Ingerlatsiviup namminersorlutik oqartussanit pigineqartup qaleralinnut akitsuut nutaaq nammineq akilersorpaa, tamannalu inatsimmik unioqqutitsineruvoq, Nusukap siulittaasua Gerth B. Lynge oqarpoq
Qaleralinnut akitsuut oqallisigineqarsimaqisoq 5 procentinik annertussusilik ukiortaamit atuutilerpoq.
Inatsisip allannguutaani paragraf 3b, imm. 1-2-mi, ersarissumik allassimavoq aalisartup akitsuut akilertassagaa, suliffissuullu tunisinermi akimit 5 procentit ilanngaatigisassagai.
Sulisitsisut peqatigiiffianni Nusukami siulittaasup Gerth B. Lyngep aalisakkanik ingerlatsivissuaq namminersorlutik oqartussanit pigineqartoq inatsimmik unioqqutitsisutut unnerluutigaa.
Unammillertinit akit qaffasinnerusut
– Royal Greenland naapertuilluanngitsumik unammillerpoq, pissutigalugu ingerlatsivissuup tunisinermi aki tamarmiusoq aalisartumut akiliutigisarmagu, tamatumalu kingorna akitsuut nammineq landskarsimut akilertarlugu.
– Taamatut peqqusersusaarluni naatsorsuusiorneq pissutigalugu Royal Greebandip tunisinermi akigititai ingerlatsiviit unammillertut tunisinermi akigititaanit qaffasinnerupput, Gerth B. Lynge oqarpoq.
Assersuutigalugu tunisinermi kiilumut akia 20 koruuniuppat akitsuutaa 5 procentiusoq 1 koruuniuvoq.
Assigiinngissuteqaqisoq
Ilulissani Aalisartut Piniartullu Peqatigiiffiat, IAPP, kisitsisinik naatsorsuisimavoq.
Naatsorsukkat naapertorlugit umiatsiaararsortoq ukiumut qaleralinnik 40 tonsinik tunisaqarsimaguni akitsuummut 40.000 koruunit missaannik akiliissaaq, 6 meterillu sinnerlugit angissusilimmik angallataatilik ukiumut qaleralinnik 150 tonsinik tunisaqarsimaguni akitsuummut 150.000 koruunit missaannik akiliissaaq.
Taamaattumik assigiinngissuteqartorujussuuvoq aalisartup nammineq imaluunniit tunitsiviup akitsuut akilerneraa.
Oqaluttuaq tamaat Sermisiami nutaami atuaruk, taannalu pisiarisinnaavat uani