naatsorsuutit
Royal Greenland millioninik qaloorivoq
Ukiup qaammataani arfinilinni siullerni suliffeqarfik ukiup siulianut 2016-imut sanilliullugu pitsaanerujussuarmik iluanaaruteqarpoq.
Nunatsinni suliffeqarfiit annersaata, Royal Greenlandip, ukiup 2017-ip qiteqqunnerani naatsorsuutit saqqummiuteqqammerpai.
Akileraannginnermi angusat 2016-imi ukiup qiteqqunnerani 7 millionit koruuninik amigartoornermit ukiumi maanna naatsorsuiffiusumi 32 millionit koruuninik angusaqarpoq.
Kaaviaartitallu 9 procentimik qaffariarput, 2016-ip qiteqqunnerani 2,4 milliarder koruuninit 2017-imi 2,6 milliardit koruuninut.
Tunisaqarluarneq
Annertuumik siuariarneq Kangiani aammalu Amerikap avannarliup tuniniaaffiulluarnerat kiisalu Skandinaviami tunisaqarluarneq angusaqarluarnermut sunniuteqarluarsimapput.
- Pingaartumik tunisassiat pingaarnerit raajat qalipallit saattuallu tunisaalluarnerat angusatigut ingerlalluartoqarneranut peqqutaanerpaapput, aammali raajat seernartulikkat, nipisat suaat aalisakkallu pujuukkat siuariarfiupput, Royal Greenland tusagassiuutinut nalunaarummi allappoq.
Naallu qalerallit nunami tunisassiorfinni tunisassiat ilaatigut Royal Arctic Linep assartuinikkut ajornartorsiuteqarneranik akimmisaartinneqarsimagaluartut qalerallit kilisaatini tunisassiarineqartut ukioq manna ingerlalluarnerisigut qaleralinnik tunisaqarneq ataatsimut isigalugu siornatut ineriartorfiuvoq.
Ukiumut ilimagisat
- Pingaarnertut tunisat raajat uusut qalipaajakkallu tunisinermi akitigut appariartorfiusut akimmisaarfiusimapputttaaq, pingaartumik mikisut eqqarsaatigalugit. Tuluit Nunaata EU-mit aninialersaarnerata kingunerisaanik tuluit aningaasaata qaammatini kingullerni nalikilliartornera taamatuttaaq ukiup qiteqqunnerani angusanut 18 millionit koruuninik kingunerlutsitsiffiuvoq, tusagassiuutinut nalunaarummi oqaatigineqarpoq.
Aalisakkat qaqortunik nerpillit, pingaartumik saarulliit nunatsinneersut qaleralittulli kingusinaartumik assartuiffiusimasoq siornamut naleqqiullugu 5 procentimik kinguariarfiuvoq.
Ukiup naanissaani akileraannginnermi angusat siorna qaammatini aqqaneq marlunni naatsorsuutit assigissagaat ilimagineqarpoq, aamma Royal Greenlandip niuernermini aningaasat pingaarnerit atortagaasa nalingi – tuluit, japanimiut aammalu amerikamiut aningaasaat – qallunaat EU-milu aningaasaannut naleqqiullugit appariarfiusimagaluartut.