Thursday, April 20, 2017 - 07:14

Royal Greenland kilisaatinik nutaanik pisisoq

Kilisaatit nutaat marluk Royal Greenlandip pisiarisaani kingulliit ilaanniipput, taakkununngalu aningaasaliineq piffissami kingullermi annertunerpaavoq.
Assi.: pr-foto
Kilisaatit nutaat marluk 2019-iminngaanniit aalisakkanik raajanillu kilisalissapput. Kilisaatinik pisineq suliffeqarfiup piffissami kingullermi tamanna annerpaamik aningaasaliiffigaa, piffissallu ingerlanerani suliffinnik amerlanerusunik pilersitsiniarpoq.

Royal Greenlandip kilisaatai marluk, Sisimiut aamma Qaqqatsiaq taarserneqassapput.

Suliffeqarfissuarmi kilisaatinut marlunnut nutaanut aningaasaliivoq, taakku 209-ip qeqqata missaani tunniunneqassapput.

Tamanna naatsorsuutaanni pingasunngornermi ualikkut saqqummiunneqartumi atuarneqarsinnaavoq.

Atuaruk: Royal Greenlandip naatsorsuutit aatsaat taama angusarissaartigisut saqqummiuppai

- Kilisaatit useqarsinnaanerussapput, ungasissuliarsinnaassallutik aammalu inuttanut atugassaqartitsilluarnerusinnaassallutik, Royal Greenlandimi tunisassiornermi pisortaq Lars Nielsen, suliffeqarfissuup atuagassiaanut Navigatiomut oqarpoq.

Palitsit 500-t sinnerlugit
Kilisaatit marluusut aappaa tapertariissitsisinnaavoq, tassa imaappoq kilisannerinnarmuunngitsoq atorneqarsinnaasoq. Tapertariissitsisinnaasup Sisimiut taarsissavaat, taanna 82 meterisut takissuseqarpoq, palitsillu 886-t angullugit useqarsinnaavoq.

Kilisaatip aappaata Qaqqatsiaq taarsissavaa, taanna 83 meterisut takissuseqarpoq, kisianni ikinnerusunik palitsinik 670-inik useqarsinnaassalluni.

Atuaruk: Royal Greenland suliffinnik nutaanik 200-nik pilersitsisimavoq

Kilisaatit ilaatigut sivisunerusumik Svalbardimut, Ruslandimut aamma Tunup avannaanut aalisariarnernut atorneqartassapput.

Siunissami suliffeqarfinnik pilersitsiniartut
Kilisaatit 2019-imi angalasinnaanngorunik, sulisunik amerlanerusunik pisariaqartitsisoqarnissaa Lars Nielsenip nangilluni oqaatigaa.

- Umiarsuarni nutaassani inuttassat aaqqissuunneqarnissaat suli aalajangiunneqanngilaq, taamaakkaluartorli inuttat ullumikkornit amerlanerusut pisariaqartittussaassavagut. Umiarsuit tunniunneqarnissaannut ikinnerpaamik ukiut marluk suli ingerlassapput, mikisuarsuit isumaqatigiissutissallu naammassinissaat maannakkuugallartoq isumageqqaassavagut, Lars Nielsen oqarpoq.

Kilisaatit marluk Sisimiut aamma Qaqqatsiaq 1992-imi aamma 2002-mi sananeqarnikuupput.

Seneste nyheder / Nutaarsiassat kingulliit