atoqqiineq
Royal Greenland atoqqiinikkut sipaaruteqarniartoq
Royal Greenlandip atoqqiisarneq aallutilerpaa, pappialanillu raajanik nassiussinernut atorneqartartunik pisisarneq affaannangajanngortinnissaa naatsorsuutigaa.
- Royal Greenland ukiut sisamat ingerlaneranni pappialanik atuinerput annerpaamik 68 procentimik annikillissaaq, CO2-mik aniatitsinerput annerpaamik 63 procentimik annikillissaaq, poortuutissaanik nutaanik pisiortortalerpat poortuutissanut aningaasartuutigisartagaasa tungaatigut annerpaamik 45 procentimik sipaaruteqarfiussaaq, ingerlatseqatigiiffik nittartakkamini ilisimatitsivoq.
Karsersuit ukkatarineqarput - karsersuit ninngusuut - Aalborgimut tunisassiorfimmi nassiussinermi atorneqartartut, tassanilu raajat pisiniarfinni karsit pisisartut takusartagaannik poortoqqinneqartarput.
Misileraaneq ingerlanneqarpoq
- Karsersuit ninngusuut atortaligassavut misilittaleruttorpavut, taakkualu ima ninngutigipput allaat 20-eriarluni atorneqarsinnaallutik. Royal Greenlandip Sisimiuni raajanik tunisassiorfia karsersuarnik ninngusuunik assigiinngitsunik tallimanik avammullu nassiutinnginneranni immerneqartartussanik nassitsivigineqarpoq. Karsersuit ninngusuut pineqartut raajanik tunisassianik naammasseriikkanik Royal Greenlandip Sisimiuni Ilulissanilu tunisassiorfiutaaniit poortoqqitassatut Royal Greenlandip Aalborgimi tunisassiorfianut nassiussinermut siunissami atortalernissaat anguniarparput, Royal Greenlandip pisiortornermut immikkoortortaani Svenstrupimiittumi poortuutissat pillugit ilisimasalittut sulisoq Jørgen Møller oqarpoq.
Royal Greenlandip Sisimiuni Ilulissanilu tunisassiorfiini raajanik tunisassianik avammut nassiussinermut karsersuit ninngusuut ukiumut 11.000-t missaat Royal Greenlandimit atorneqartartut, Jørgen Møller oqarpoq. Karsersuarnik ninngusuunik atoqqinneqarsinnaasunik atoqqiisarneq karsersuit ninngusuut ukiumut atortagai 3000-innanngornerannik kinguneqarsinnaavoq.
Taakku karsersuit nutaat ukiaanerani tamakkiisumik atulerneqarnissaat naatsorsuutigineqarpoq.