Royal Arctic Line
Royal Arctic Linep ukioq manna annikinnerujussuarmik sinneqartooruteqarnissartik naatsorsuutigaa
Royal Arctic Linep aqutsisuisa ukioq manna 2016-mut sanilliullugu annikinnerujussuarmik sinneqartoornissartik naatsorsuutigaat, tassani akileraarutinut ilanngaatit minillugit 143 mio koruuninik sinneqartoorsimapput.
Naatsorsuutit pingasunngornermi saqqummiunneqartumi, RAL-imi aqutsisut allappoq 2017-mi akileraarutit ilanngaataat minillugit sinneqartoorutit 15 – 25 mio koruunit missaaniissasut ilimagalugit.
Iliuusissat allanngortinneqanngitsut
Royal Arctic Linemi siulersuisuni siulittaasup, Kuno Fenckerip, Sermitsiamut oqaatigaa:
- Ataqatigiinnermut aaqqissuussinermut, assartueqatigiinnermut umiarsuaatinulli pitsanngorsaanissamut iliuusissatut pilersaarutigut allanngortinngilagut.
Ullut arlaqanngitsut qaangiupput Aalborg Havni RAL-ilu ataatsimeeqatigiipput, tassani 2022-ip kingorna pilersaarutaasut saqqummiunneqarlutik.
- Isumanga malillugu pitsaasumik anguniaqarfiusumillu ataatsimeeqatigiippugut. RAL-ip Danmarkimi annikillisaasimanera ilutigalugu RAL-imut akinik saqqummiussisimavugut. RAL-illu ataatsimeeqatigeeqqinnissatsinut kisitsisit misissuataassavaat, ataatsimiinnissap tullia 2017-ip juuni qaammataani pissaaq, Claus Holstein, Aalborg Havn A/S-imi pisortaaneq tusagasiuutinut nalunaarummi oqarpoq.
Isumaqatiginniartoqanngitsoq
Siulersuisuni siulittaasup Kun Fenckerip siunissami Danmarkimi umiarsualivik sorleq atorneqassanersoq oqaaseqarfigerusunngilaa, taamaattoq paassissutissiaraa RAL-ip qullersaqarfiata Aalborg Havni oqaloqatigingaa, erseqqissaassutigaali isumaqatiginninniarnermik ingerlatsisoqanngitsoq.
RAL Aalborg Havnimut 2022 tungaanut isumaqatigiissuteqarpoq. Aarhus Havni umiarsualivittut atorneqarsinnaasoq oqaatigineqarsimavoq, RAL-immi siunissamut pilersaarutaannut naapertuulluarnerummat. RAL-illu islandimiut umiarsuaateqatigiiffia Eimskip suleqatiginissaanut aallartereersimavaat, taakku Aarhus Havni atugarivaat.
Suleqatigiilluartut
Islandimiut suleqatiginerat Kuno Fencker naatsumik oqarpoq:
- Eimskip-ip suleqatiginera pilersaarutit malillugit ingerlavoq.