ukiup affaanut naatsorsuutit
Royal Arctic Line ukiup affaanut naatsorsuutimini 28 mio. koruuninik amigartooruteqartoq
Naak ukiup affaanut naatsorsuutini amigartooruteqarfiungaluartoq umiarsuaatileqatigiiffiup 2017-imi sinneqartooruteqarnissani naatsorsuutigaa
Royal Arctic Line 2017-imi ukiup affaani siullermi 28 mio. koruuninik amigartooruteqarpoq.
Umiarsuaatileqatigiiffik tusagassiuutinut nalunaarummi allappoq.
RAL-ip piffissap taamaasinerani naatsorsuutigisimangaluarpaa 15 mio. koruniinik amigartooruteqassalluni.
- Ukiup affaanut naatsorsuutit takutippaat ukioq Royal Arctic Line-imut unamminartuusimasoq, umiarsuaatileqatigiiffik tusagassiuutinut nalunaarummi allappoq.
Sinneqartuussaganeq
Piffissap pineqartup iluani Royal Arctic Line eqqornerlunneqarpoq, soorlu Mary Arcticap sikumut aporneratigut, Johanna Kristinap Tunumi ajoquserneratigut aammalu Arina Arcticap kivittaataanik ajornartorsiuteqarnitsigut.
- Ukiulli affaani siullermi unamminartut annerpaartarivaat IT-qarnitsigut naammaginartumik ingerlasinnaasimannginnerput. Inniminniinernik aqutsiniarnerput aammalu assartukkat killiffiinik malinnaaniarnerput piffissami pineqartumi naammaginartumik malersorsinnaasimanngilagut pisullu amerliartornerat ilutigalugu, aamma ajornartorsiutit suleriaatsitsinnut ingerlatseriaatsitsinnullu tuniluussimapput.
Sullississutitta ukiup sinneranut pitsaassutsikkut patajaallisarnissaannut, maannalu ukiup affaata naammaginartumik suliassaqarfiusimanera eqqarsaatigalugit, ukiup sinnerani ukiup affaata kingulliup DKK 5 millionit 15 millionillu akornannik angusaqarfiunissaa naatsorsuutigineqarpoq