Royal Arctic Line pilersaarusiorpoq

Umiarsuaatileqatigiiffiup kiffartuussinerlunnerup kingunerisaanik atuisut kipiluttuneqqanerat paasisinnaalluarpaat.

Ukiamut peqqumaatissat qulakkeerneqartut

Umiarsuaatileqatigiiffik immikkoortuni pingasuni ima qularnaveeqqusiivoq:

• Ukiornissaanut pilersuinerit ingerlatsinikkut inissisimanermit sunniuteqarfigineqannginnissaat aalajangiusimavarput.
• Avannaani qerititsiviit imaarneqarnissaannut sunniuteqannginnissaat aalajangiusimavarput.
• Angalanermut pilersaarut patajaallisereerutsigu decembarip qiteqqunneranit kiffartuussinermut akuerineqarsinnaasumut utersimanissarput aalajangiusimavarput.

- Atlantiku ikaarlugu umiarsuit angalanerisa tatiginnannginnerat kiffartuussinitsinnut sunniuteqartupilussuusimavoq. Umiarsuit kinguaattoorneri aasaanerani systemimik ajornartorsiuteqartoqarneranik kiisalu Nuummi umiarsualivittaap atulerneranik, naatsorsuutigisamit ajornakusoornerusimasumik pissuteqarput. Umiarsuaativut tulleriiaatinnarlutik angalapput tamannalu umiarsualivinni angummanniarnermik ajornartorsiutinik pilersitsisimavoq, umiarsuaatileqatigiiffik tusagassiuutinut nalunaarummi oqarpoq.

Aajuku ajornartorsiutit

Ajornartorsitigineqartut immikkoortunut sisamanut ima immikkoortineqarsimapput:

1. Tamanna quersuarnut containerinik tunniussinermik taamatullu aamma nassiussanik ataasiakkaanik tunniussinermik eqquisimavoq. Ajortut naaffeqannginnerinik tamanna pilersitsisimavoq: Terminalimi kinguaattoornerit umiarsuit kinguaattoornerinik kinguneqarput, taamaalisoqarneratigut ataatsikkoorlutik umiarsualivinniipput tamannalu aamma terminalimi quersuarnilu kinguaattoornernik pilersitseqqilluni.
2. Nunatsinni containerinik imaqanngitsunik uninngasuutitaqarneq aamma umiarsuit tulleriiginnaq angalanerannit eqqugaavoq, containerit imaarneqartussat umiarsuup tullianut usineqarnissaannut imaarneqarnissaat angumerineqarsinnaasimanani.
3. Aalborgimi containerinik imaqanngitsunik uninngasuutitaqarneq ajornartorsiummit tamatuminnga aamma eqqugaavoq.
4. Pallettinik uningasuuteqarneq containerinik imaqanngitsunik naammattunik peqarsimannginneranik aamma eqqugaavoq.

Periuusissiaq

Aajuku umiarsuaatileqatigiiffiup periusissiai arinfeq-pingasunik immikkoortulerneqarsimasut:

1. Umiarsuup Nuummut decembarip arfineq-aappaani tikinneratigut angalanermut pilersaarutip nalinginnaasunngoqqinnissaa naatsorsuutigineqarpoq. Taamaattoqarneratigut sumiiffinnut avannarpasinnerumiittunut umiarsuit kingulliit nalinginnaasumik angalanissaat attatiinnarneqassaaq.
2. Allamik umiarsualiivugut, taannalu Aalborgikkoortumik Nunatsinnut tikinnginnermini containerinik imaqanngitsunik Rotterdamimi usineqarpoq. Umiarsuaq pineqartoq pilersaarutit malillugit Nuummut decembarip 20-ani tikissaaq, tamatumalu kingorna containerit imaqanngitsut decembarip 23-ani Sisimiunut tikisinneqassallutik.
3. Nuummi sanaartornermik sulianut atatillugu nassiussat immikkut ittut isumaginissaannut atugassamik ilassutitut umiarsualiivugut.
4. Nuup Umiarsualiviani suleriaatsit nutaat sungiunniarnissaata qulakkeernissaa immikkut suliaqarfigivarput.
5. Pallettit 10.000-it missaanniittut sumiiffinnut assigiinngitsunut nassiussorneqarnissaat eqqumaffigineqarpoq.
6. Royal Arctic Linep IT-systemiata nutarterneqarnera malunnaateqarluartumik pitsanngorsagaasoq sapaatit akunnerata suliani atulersinneqarpoq, tamannalu angalanissamik pilersaarusiornerup allanngortinneranut suliaqarnermut oqilisaataavoq.
7. KNI suleqatigalugu sumiiffinnut ukiuunerani matoqqasartunut nioqqutinik umiarsuarnut kingullernut pilersuinissaq qanittumik malittareqqipparput.
8. Ukiornissaanut pilersuinernut tunngatillugu nunaqarfinnut nassiussassat isumaginissaannut Aasianni ikiuuttussanik ilaatigut Aalborgimeersunik ilassutitut sulisussarsivugut.

Qularnaveeqqut

Umiarsuaatileqatigik qularnaveeqqutigaa, ukiamut peqqumaatit sunnerlunneqannginnissaat, qerititsivinnik imaarsisoqarlunilu containerinik imaqanngitsunik tikittoqarumaartoq.

- Kissaatigineqartutut sukkatigisumik tamanna pissava? Naagga. Aaqqiissuteqarnerli pilersaarut qulaani taaneqartoq malillugu sapinngisamik sukkanerpaamik pissaaq, umiarsuaatileqatigiiffik qularnaveeqqusiivoq.