ukiup affaanut naatsoruutit
Royal Arctic Line millionilikkaanik sinneqartooruteqartoq
Umiarsuaateqarfik Namminersorlutik Oqartussanit pigineqartoq ukiup affaani siullermi 17 millionit koruuninik sinneqartooruteqarpoq
Royal Arctic Line ukiup affaani siullermi akileraartinnani 17 millionit koruuninik sinneqartooruteqarpoq.
Tamanna suliffeqarfiup ukiup affaanut naatsorsuutaani takuneqarsinnaavoq.
Royal Arctic Linep siulersuisuisa angusaq naammaginartutut nalilerpaat.
Atuaruk: Polenimiut amutsiviat RAL-imut umiarsuarmik nutaamik sanassaaq
Aningaasartuutit annikillineqartut
- Suliffeqarfiit mikinerit tunineqarnerisigut aammalu suliffeqarfissuup ingerlanneqarnerata pisariinnerulersinneratigut umiarsuillu ingerlanneqarnissai qitiutinneqarnerisigut allaffissornikkut sulisoqarnikkullu aningaasartuutit 13 million koruunit missaannik appariaateqarput, Royal Arctic Line allappoq.
Atuaruk: RAL-ip sanaartukkat marluk tuniniarpai
Sipaarniarnerit amerlanerusut
Akinut isumaqatigiissutaasimasup atorluarneratigut uulianut akigititat annikinnerusimapput, taamaattumillu aamma tassuuna aningaasartuutit 13 million koruuninik aamma appasinnerusimallutik.
Sipaarutaasimasut allat 7 millionit koruuniusut umiarsuarnik ingerlatsinerup iluaniipput, nalinullu appaanerit annikinnerusimammata suliffeqarfiup aningaasartuutai katillugit 38 million (immikkut ataasiarlugit nalunaarsukkat minillugit) koruuninik appasinnerupput tamannalu ukioq kingulleq taamaalineraninngaanniit 10 procentimik appasinneruvoq.
Erloqinartoq
Assartugassat amerlinerisigut kaaviiaartitat aamma annertunerulerput. Taassumalu saniatigut umiarsuaatileqatigiiffiup sullitaminut assartuineq 10 million koruunit missaannik ukiup aallartinnerani apparpaat, taamaasiorsinnaanermullu peqqutaavoq uulianut akiliutaasartut appasinnerusimanerat.
Umiarsuaatileqatigiiffimmut nutaanik umiarsualiortitsineq suli maannamut erloqinartorsiorfiuvoq.
- Maanna umiarsualiortuninngaanniit kinguartooruteqarnermut aaqqiissutaasinnaasumik misissuisoqarpoq, tassungalu atatillugu umiarsuarnik marlunnik pisinissaagaluaq taamaatiinnarneqarpoq. Ukiup affaanut nalunaarusiami uani takuneqarsinnaapput aningaasartuutit umiarsualiortitsinissamut attuumassusillit ataasiarlugit nalunaarsukkat, Royal Arctic Line allappoq.
Inuiaqatigiit aningaasaqarnerulernerat
Assartugassat Kalaallit Nunaanniit Kalaallit Nunaannullu annertusisimanerata inuiaqatigiit iluanni aningaasaqarnerulersimasoq takutikkaat erseqqissarneqarpoq.
- Umiarsuaatileqatigiiffimminngaanniillu nuannaarutigineqartorujussuuvoq Kalaallit Nunaanninngaanniit annissukkat ukioq kingullermut sanilliullugit 22 procentimik qaffariaateqarsimammata. Tamannalu piviusunngortinneqarpoq inissap iluamik atorneqartalerneranit aammalu aalisarnerup isertitaqarnerulerneratigut. Kaaviiaartitallu annertusineranut taakku peqqutaanerpaapput.
Umiarsualiorfinnut aningaasartuutissat ataasiakkaat naatsorsuutigineqareerneraniit ukiup sinneranut naatsorsuutigineqarpoq naatsorsuutip 2015-imituulli isikkoqarnissaa, taannalu ingerlatsinerup pitsaanerulersimaneranik takussutissiivoq.
Atuaruk: Avammut tunisat eqqussukkallu amerleriarnerat RAL-ip siuariaatigaa