toqusoqarneq
Rockimik nipilersortartoq Chris Cornell tassanngaannartumik toqukkut qimaguttoq
Nipilersortartoq tusaamasarsuaq, Chris Cornell, nipilersoqatigiinni Soundgardenimi erinarsortuusimasoq, 52-inik ukioqarluni toquvoq.
Amerikamiu rockimik nipilersortarnerminik tusaamaneqarluartoq, Chris Cornell, 52-inik ukioqarluni toqukkut qimaguppoq, Reuters aallaavigalugu nutaarsiassaqartitsivik AP taama allaaserinnippoq,
Nipilersortartoq rockimik nipilersoqatigiinni Soundgardenimi erinarsortuusimavoq. Tassanngaannartumillu toqunera ilaqutaasunit ilisimatitsissutigineqarpoq, tamanna Detroitimi pivoq.
Soundgarden aamma Audioslave
Chris Cornell, Christopher John Boylemik ateqavippoq. 1980-ikkunniik 1990-ikkut naalernerat tikillugu Soundgardenimi erinarsortuuvoq, 2000-kkunnilu nipilersoqatigiinni Audioslavemi erinarsortuulluni. Soundgarden 2010-mi aallarteqqimmata, taanna peqataaqqissimavoq.
Rockimik nipilersortartup saqqummersitaani nuannarineqarnerpaat ilagaat "Black Hole Sun", nipilersoqatigiinnit Soundgardenimit 1994-imi saqqummersinneqartoq. Erinarsuullu taanna rockimik sakkortuumik saqqummersitani pitsaanerpaatut Grammy-mik nersornaaserneqarpoq.
Ukiut 13-nit cd-llu tallimat
Erinarsuut taanna Soundgardenip saqqummersitaani siullermiippoq. Nuusiamilu tassani aamma erinarsuut "Spoonman" metalimik nipilersoriaatsimi pitsaanerpaatut kingorna Grammy-mik nersornaaserneqarpoq.
Soundgardenimi nipilersortut ukiuni 13-ini atareerlutik 1997-imi avissaarput, Chriss Cornellilu kisimiilluni ingerlaannarpoq.
Saqqummersippaalu "Euphoria Morning", aappassaanillu saqqummersitsisussanngorluni Cornell naaggaarsinnaanngisaminik neqeroorfigineqarpoq.
Tom Morello, Tim Commerford aamma Brad Wilk peqatigalugit nipilersoqatigiit Audioslave 2001-imi pilersippai. Nipilersoqatigiit 2007-imi avissaarnissamik tungaanut pingasunik nuusiaqarput, Cornellip nipilersornikkut aaqqiagiinngissuteqarneq pissutigalugu nipilersoqatigiit taamani qimappai.
Meeqqat pingasut qimakkai
Cornell nammineerluni marlunnik saqqummersitseqqippoq, Soundgardenilu 2010-mi katersuuteqqipput 2012-imilu "King Animal" saqqummersillugu.
Chris Cornell Seattlemi peroriartorpoq. Nuliarisimasani Soundgardenillu managererisimasaa Susan Silver paneqarfigaa, maannalu nuliarisani Vicky Karayiannis erneqarfigalugu.
/ritzau/