assammik arsarneq

Rina aamma Hadsten Miakkunnut ajugaapput

Arnat kalaallit assammik arsartartut sapaatiummat unammipput. Hadsten unamminermi ajugaapput

Mia Egede Rasmussen (saamerleq) aamma Rina Møller Lorentzen (talerperleq) sapaatiummat unammipput

Målmandi Rina Møller Lorentzen aamma timersoqatigiiffigisaa Hadsten Sports Klub Mia Egede Rasmussenikkunnut Lyngby HK-mut sapaatiummat unammipput Danmarkimi arsarnermi 1. divisionimi.

Lyngby unamminermi aallartilluarput, minutsini siullerni 0-3-mik siuarlutik. Minutsini qulini unammereerlutik Rina Møller Lorentzen paarlaatsinneqarpoq.

- Unamminissamut pissangasorujussuuvunga. Ajoraluartumik unamminermi iluatitsilluanngitsoorpunga. Mia aamma ilisarisimasorujussuuara, siornatigut suloraqatigiittarnikuuvugut, Rina Møller Lorentzen Sermitsiaq.AG-mut oqarpoq.

Ataasiarluni straffemi isertitseriartoq annaappaa. Muminnermi Hadsten Sports Klub 16-13-mik siuaqqavoq.

Mia pakatsivoq
Unammineq aallarteqqinneqarmat Hadsten arsarluavippoq, unamminermi 31-23-mik ajugaallutik.

Mia Egede Rasmussen ataaseriarluni unamminermi isertitsivoq, minutsillu 40-t sinnerlugit unammeqataalluni.

- Immikkoortup siulliup naammassilernerani katataavugut, holditut ataatsimoorsinnaannginnerput peqqutigalugu. Aamma Hadstenikkut imminnut ilisarisimanerat malunnarsivoq.

- Ajortoqalaaraangat nakkassutigisarparput, unamminermi aamma uani taamaappoq. Aamma måliniittuusoq annaasseqattaarluarpoq. Ilagut ilaat ajoqquseqqanerat malunnarsivoq, amigaatigigullu malunaarsilluni, Mia Egede Rasmussen Sermitsiaq.AG-mut oqarpoq.

Unamminerit pitsaanerulerumaartut siunissami suli naatsorsuutigaa.

Hadsten Sports Klubip ajugaareernermi kingorna 1. divisionimi pingajuattut inissisimaannarput, Lyngby HK arfineq aappaattut inissisimasut.

Powered by Labrador CMS