Torrak!
Ridley Scottip tv-mi nangeqattaartuliaani Nive Nielsen inuttaassaaq
Kalaaleq erinarsortartoq aamma isiginnaartitsisartoq Nive Nielsen tuluit isiginnaartitsisartut tusaamasat isiginnaartitseqatigissavai.
Ridley Scottip filmiliaani nangeqattaartussiami 'The Terror'-imi Nive Nielsen pingaarutilimmik inuttaassaaq. Soundvenue taama allaaserisaqarpoq.
Nangeqattaartumi qulinik immikkoortortoqartussami qulingiluani isiginnaartitseqataassaaq.
Ridley Scott ilitsersuisartoq ilisimaneqarluarnerata saniatigut, aamma isiginnaartitsisut tusaamasat inuttaassapput.
Soundvenue naapertorlugu Jared Harris (’Mad Men’, ’The Crown’), Ciaran Hinds (’Game of Thrones’) aamma Tobias Menzies (’Broadchurch’) umiarsuarmi HMS Terrorimi inuttatut inuttaaqataassapput.
Oqaluttuaq ilaatigut 1847-mi ilisimasassarsiorluni angalanerup oqaluttuassartaanik piviusumik tunngaveqarpoq, tassani Nordvestpassage nassaariniarneqarluni. HMS Terror sikkussaaqqavoq, inuttallu ukiuni marlunni avammut attaveqaratik uumaniarsimapput. Nive Nielsen umiarsuarmi arnartatuaassaaq.
Nangeqattaartuliami qanga pisimasunut nassuiarneqarsinnaarpianngitsunik ilalersorneqassapput. Tassami inuttat eqqumiitsumit uumassusilimmit saassunneqarput, tamannalu uumaniapiloornermik kinguneqarpoq. Nangeqattaartuliaq Dan Simmonsip 2007-mi oqaluttualiaanik aallaaveqarpoq.
Tv-mi nangeqattaartuliamut peqataanermigut Nive Nielsen annertuumik inuttaaffeqalerpoq. Siornatigut Terrence Malickip filmiliaani 'The New World'-imi Colin Farrell isiginnaartitseqatiginikuuaa.
Nive Nielsen and the Deer Childrenip siorna nuuteerat 'Feet First' saqqummersippaa. Sapaatip-akunnerata tulliani Danmarkimi arlaleriarluni tusarnaartitsissaaq, ilaatigut DR-ip tusarnaartitsisarfiani.
The Terror AMC-mut immiunneqassaaq.