RG-p pisortaanera: Kinamiut pinngitsoorsinnaanngilavut
Royal Greenland suliffissuaatimini massakkorpiaq inunnik 120-nik sulisussaaleqivoq.Inuit pissamaatigisat sulilersittariaqarpavut, pisortaq Jens K. Lyberth oqarpoq.Sulinermut ileqqorissaarnerunissaq ujartorpaa
- Sumilluunniit atorsinnaasoqanngilaq. Kinamiut kisimik. Sulisullu naammaginartumik aalajaatsut ikittut.
Royal Greenlandip pisortaa Jens K. Lyberth tinnersaaraluni taamatut oqarpoq. Nunatsinni inuiaqatigiinni sulisitsisunut politikerinullu ikioqqussutitut.
AG aviisi taama allappoq.
Ukiuni 40-ni sorsuuteqarneq
Tassami Royal Greenlandip ukiuni 40-ni ajornartorsiut taannarpiaq sorsuutigisimavaa: Aalisarlualeruttornerup nalaani aalisakkanik suliffissuarni sulisussaaleqisarneq. Massakkorpiaq suliffissuarni atorfiit 120-t inuttaqanngillat.
Royal Greenlandili kisimi sulisussaaleqinermik erloqinartumik ajornartorsiuteqanngilaq. Aamma utoqqaat illui, meeqqeriviit, meeraaqqeriviit, atuarfiit, napparsimmaviit sulisussaaleqisorujussuupput, Jens K. Lyberth eqqaasitsivoq.
- Qanoq pisoqartariaqarpoq. Allaanngilaq isiginngitsuusaaginnartugut. Ajornartorsiut ukiorpassuarni atuussimavoq. Sungiutiinnarsimagippununa.
- Suliffissuaatitsinni amerlasuut akisussaassuseqarluartuupput. Sulisunillu amigaateqaraangatta immikkut ulapittaqalutik. Qasusuulerpulli. Piffissanngorpoq sulinermut ileqqorissaarneq annertunerusumik eqqarsaatigilissagipput. Suliartunngikkaangavit suliassatit kia isumagisarpai? Suliartunngikkaangavit kikkut eqqorneqartarpat? Suliartunngitsoortoqaraangat sulisartut aalajaatsut akisussaassusillillu eqqorneqartarput, pisortaaneq AG avisiimit apeqqarissaarfigineqarluni erseqqissaavoq.
Apeqqarissaarneq AG aviisimi tamaat atuaruk. Aviisi uani pisiassaavoq: