RG-p kilisaataataani inuttaq sulitilluni ajutoortoq

Royal Greenlandip kilisaataasa ilaat Tunumi silarluttupilussuarmi aalisartilluni ajutoorfiuvoq wireri sarrinermini angutinik pingasunik eqquimmat, ataaseq ajoquserlugu.

Ajutoorneq arfininngornermi aalisarnerup nalaani pivoq, tassani angut 29-nik ukiulik niaqqumigut wiremik toqqineqarmat.

- Silarluttumi aalisartoqarnerani ajutoortoqarpoq. Wireri sarrimmat angutit pingasut eqqorneqarput, taakkunani ataaseq kilisaatip sinaanut tammigussaareerluni niaqqumigut innarlerpoq, Royal Greenlandimi ingerlatsinermi tunisassiornermilu ingerlatsisoq Samal J. Olsen Royal Greenlandip nittartagaanut taama oqarpoq.

Samal J. Olsen Royal Greenlandip nittartagaanut oqaluttuarpoq, angut Royal Greenlandip kilisaataataanni malittarisassani isumannaallisaanermut tunngasuni piumasaqaatit malillugit ajutoornermi nalaani niaqorortinnaveeqquteqarsimasoq.

- Niaqorortinnaveeqquteqarninilu pissutigalu innarlernera annertunerunngilaq. Angutit allat marluk vaajarimit aamma eqqorneqartut innarlinngillat, annilaarujussuarlutilli, Samal J. Olsen oqarpoq.

Islandimi maanna napparsimavimmiippoq
Kisianni angut 29-nik ukiulik ajoqusernermi kingunitsianngua qulimiguulimmik silarlunnera pissutigalugu aaneqarsinnaasimanngilaq, sapaammilu ullaakkut aatsaat Reykjavikkimi napparsimavimmut apuunneqarsinnaasimavoq.

- Angut innarlertoq massakkut ajunngilaq, arnaataatalu Reykjavikimi napparsimmavimmi massakkut najorpaa, Samal J. Olsen oqarpoq.

Royal Greenlandimit nalunaarutigineqartut naapertorlugit ajutoortoq Nunatsinnut ingerlanneqassaaq nakorsat angallanneqarnissaa ulorianaateqanngitsutut nalilerniariarpassuk.