kinamiut suliartortut

RG: Nunaqavissunik sulisussarsisinnaannginnatta suliartortitsisarpugut

Nunatsinni suliffeqarfiit annersaat, Royal Greenland, maanna sulisussanut nutaanut 27-nut sulinissamut najugaqarsinnaanermullu akuersissut maanna utaqqillugu suliffeqarfissuaq ilisimatitsivoq.

Royal Greenland Avannaata Kommunianit aamma Qeqqata Kommunianit nunanit allaneersunik sulisunik 27-nik Kinameersunit aamma Filippinerineersunik tikisitsinissaminut akuersissuteqarfigineqarpoq.

- Maanna Udlæningestyrelsemiit sulisussat nutaat sulinissamut najugaqarsinnaanermullu akuersissutissaat utaqqivarput, suliffeqarfissuarmi sulisoqarnermi ingerlatsisoq, Søren Olsen Damgaard.

Royal Greenland nittartakkamini taama allaaserisaqarpoq.

Royal Greenland naapertorlugu sulisussat nunanit allaneersut katillutik 27-iusut Tasiusami, Ilulissani, Sisimiuni aammalu Maniitsumi sulissapput.

Aamma atuaruk: Royal Greenland Kinamiunik amerlanerusunik aallerniartoq

Apriilimi tikissasut
27-usunit akuerineqarnissamut utaqqiinnartunit, 18-t Kinameersuupput, qulingiluat Filipinerineerput. Taakkulu apriilimi tikissapput.

- Nunaqavissunik aalaakkaasumik sulisinnaasunik naammattunik pissarsisinnaannginnerput pissutigalugu nunani allaninngaaneersunik sulisussanik tikisitsissaagut, Søren Olsen Damgaard, suliffeqarfiup nittartagaanut taama oqarpoq.

Aamma atuaruk: Kinamiut siulliit tikittut

Ukiunut marlunnut isumaqatigiissutit
Sulisussat nunanit allaneersut katillutik 27-iusut Tasiusami, Ilulissani, Sisimiuni aammalu Maniitsumi sulissapput. 2018-imi ulapaarfiup nalaani 13-it sulissapput sinnerili 14-it ukiuni marlunni Kalaallit Nunaanniiginnarlutik sulissallutik.

- Sulisussat Filipinerineersut sisamat Tasiusami ukiuni marlunni sulinissaannik isumaqatigiissuteqarfigineqarput, Søren Olsen Damgaard oqarpoq.

Taamatuttaaq Kinameersut tallimat aammalu Filipinerineersut tallimat ukiut marluk Ilulissani sulisussapput. Kinameersut tallimat Sisimiuni sulisussapput kiisalu Kinameersut arfineq pingasut Maniitsumi sulisussat aprilimiit decemberi tikillugu sulissallutik.

Kinamiut sinneri 13-it ulapaarfiusup nalaani sulisassapput, tassa apriilimit decembarip tungaanut, tallimat Sisimiuni arfineq-pingasut Maniitsumi.

Aamma atuaruk: Dorisip Mimi akissuteqarfigaa: Tunisassiorfinni ilinniarnerit aallartinneqalerput

Sinerissamit sulisussarsiniartut
Royal Greenland aamma tunisassiorfinnut taakkartorneqartunut sinerissamit sulisussarsiussapput.

- Sisimiuni sulisussanik tallimanik aamma Maniitsumi sulisussanik tallimanik 2018-imi ulapaarfiup nalaani sulisussanik atorfissaqartitsinitta avataatigut Kalaallit Nunaaneersunik sulisussanik amerlanerpaanik atorfissaqartitsivugut, Søren Olsen Damgaard oqarpoq.

Maniitsumi, Ilulissani Uummannamilu Royal Greenland Kinaminngaaneersunik katillugit 36-inik sulisoqareerpoq. Taakkua 2017-imi upernaakkut tikittut tamarmik ukiuni marlunni sulinissamik isumaqatigissuteqarput.

Aamma atuaruk: Mimi: Inuusuttagut Kinamiunut isiginnaaginnartuutinnagit sulilersitsigit

Powered by Labrador CMS