alianartoq
Regin Larsen Cubami toqungasoq nassaarineqarpoq
Regin Larsen Pisiffiup allaffeqarfiani Sisimiuni tallimanngornermi nalunaaqutaq 15.00 eqqaaniarneqassaaq
- Suleqaterput Regin Larsen Cubami feeriarnermini toqukkut qimagussimanera uppernarsarsinnaavara. Pisoq alianarpoq.
Pisiffiup pisortaanera Per Steen Larsen Sermitsiaq.AG-mut oqaluttuarpoq.
45-nik ukioqarluni toqusoq Regin Larsen Business Controlleriuvoq Pisiffimmi ukiorpassuarni atorfeqarluni.
- Regin inuttut suleqatitullu nuannarineqarluarpoq. Sisimiuni Kalaallit Nunaannilu ilisarisimasaqarluarpoq. Toqukkut qimagussimanera pingasunngormat paasivarput, qanorli toqusimanersoq paasinngilarput, Per Steen Larsen oqarpoq.
Regin Larsen Pisiffimmi suleqatiminit suleqatikuminiillu eqqaaniarneqassaaq Pisiffiup allaffeqarfiani Sisimiuni nalunaaqutaq 15.00.
Regin Larsenip Cubamit angerlaanneqarnissaa sillimmasiisarfianit akilerneqassasoq nunanut allanut ministeriaqarfik Sermitsiaq.AG-mut nassuiaavoq. Regin Larsenip toqunera ilaqutaasunut ilisimatitsissutigineqareerpoq.