Red Barnet: Prins Joachim-ip pulaarnera uagutsinnut ataqqinaataavoq

Kunngikkormiutut ataqqinassusilik Prins Joachim aammalu Kunngikkormiut Aningaasaatearfiat Det Kgl. Grønlandsfond pingasunngormat Red Barnet pulaarpaat nuna tamakkerlugu suliuniuteqarnermi paasisaqariartorlutik.

Red Barnet aallarnisarneqarnera, siunissamut neriuutit suliassallu tapiiffigisassat assigiinngitsut eqqartorneqarput, Red Barnet-ip Kalaallit Nunaanni pilersaarutai, siunissami suliniutissai suleqatigisassai kiisalu Nuummi Qaanaamilu immikkoortortaqarfii ilisaritinneqarpuut. Peqatigiiffiup aaqqissugaanerani suliniutaasut ilanngullugit eqqartorneqarput.

- Det Kongelige Grønlandsfond-kkormiut assut pitsaapput. Siorna decembarip pingajuata kingorna aallartereerluta suliniutivut pilersaarutivullu pillugit tusarniaapput. Misigisaq nuannerluinnartoq qaqutigoortuuvoq. Prins Joachimip Nunarput immikkorluinnaq uummateqarfigigaa malunnarluinnarpoq. Prinsip apeqqarissuunerata tamanna takutippaa Nunatsinnilu pulaarninni nuannarilluinnaraa aamma takutilluarpaa, Red Barnetip Kalaallit Nunaata Generalsekretæria Tillie Martinussen oqarpoq.

Prinsip pulaarnera ataqqinartoq
Red Barnetip Kalaallit Nunaata Generalsekretæriata taama oqarnera Red Barnet Kalaallit Nunaata siulittaasuanit Ruth Montgomery-Andersen-imit isumaqartigineqarpoq:

- Kunngikkormiutut ataqqinassusilik Prins Joachim aammalu Kunngikkormiut aningaasaatearfiata pulaarnerat nuannivippoq. Red Barnetip ukiuni tulliuttuni takorluugai pilersaarutaalu piffissaqarfigilluarlugit eqqartorpavut, pulaarneratalu pilersaarutaasumiit sivitsorneqarneratigut soqutiginninnertik takutilluarpaat, uagutsinnut nuannaarutaasumik. Maani Nunatsinni aningaasalersugaanngikkaluarlutik suliniuteqartut (NGO) soqutigilluarpaat, periarfissarlu iluatsillugu Kalaallit Nunaanni meeqqanut suliniutit peqatigiiffiillu assiginngitsut immikkut nittarsaalluarpavut. Kunngissap peqataanera uagutsinnut immikkut ataqqinaataavoq, malunnarporlu sapiissuseqarnerulluta Red Barnetip Kalaallit Nunaat siunissami sullissinnaanngoripput.

Kunngikkormiutut ataqqinassusilik Prins Joachim saniatigut aamma peqataavoq Det Kongelige Grønlandsfond-ip allaffiani pisortaq Elisabeth von Buchwald, pisortaq Kay Damm Jensen, naalakkersuisuusimasoq Marianne Jensen, Katuap pisortaa Julia Pars, Ilimmarfimmi Lektori Birgit Kleist Pedersen kiisalu Arktisk Kommandop sinniisua.