Real Madrid El Clasicomi kanngunarsarneqartoq

Barcelona pissartanngoriartuaarpoq, spaniamilu isikkamik arsaannermi pissartanngoqqinnissamik sinnattoq arfininngormat qaninnerulersinneqarpoq.

Real Madridimi unamminermi Barcelona unamminerup immikkoortuani unammilluareerlutik 3-0-mik ajugaapput, taamaasillutillu akeqqaminiit 14 pointinik amerlanerusunik pointeqalerlutik.

Unamminerup immikkoortuani aappaani minutsit qulit aalajangiisuusimapput, tassani Luis Suarezip aamma Lionel Messip Realikkut pissartanngornissamik neriuuteqaraluarnerat sequmippaat.

Real Madridikkut arfininngornermi "El Clasico"-leramik imminut tatigilluinnarsimangaluarput.

Real Madrid Barcelonallu unamminerat kingulleq spaniamiut Super Cup-ianni augustimi pivoq. Tassani Real Madrid 5-1-mik ajugaallualaavissimavoq taamaammallu pissartanngortussatut ilimanaateqarlursimangaluartik.

Arfininngornermilu unamminissamut qaammatialunnguit ingerlanerini Barcelona akeqqaminniit ligami siuariartuinnavissimapput.

Taamaammat Real Madridikkut pissartanngoqqinnissamut neriuuteqassagunik ajugaanissaat piumasaqaataasimangaluarpoq.

Anguniangarlu taanna unamminerup aallartinneraniit minutsit pingasut qaangiutiinnartut ajornnnginnerulersutut issimangaluarpoq, tassani Real Madridikkut illersuisartui sekundialunnguani qiimmarujussuaraluarput.

Cristiano Ronaldo arsaq niaqummillugu isertippaa, isertitsinerlu utaqqisutut nalilerneqarluni atorunnaarsinneqarpoq.

Minutsialunnguit qaangiuttut Ronaldo periarfissaneqqikkaluarpoq. Ronaldo målit saavanni paarineqanngivissoq naqqatigut qeqqanoorinermi toraarneqaraluarpoq, taamaattoq piffissaqarluarluni inissaqarluaraluarlunilu portugalimiup arsaq uniorpaa.

Unammineq minutsinik 30-nik pisoqaassuseqartoq Barcelonami unammisartoq Paulinho isertitsinissamut periarfissaqarluarsimangaluarpoq. Lionel Messip tunisinera Paulinhop tiguaa, taassumalu sakkortuumik isertitseriarnera Madridip-målmandiata Keylor Navasip annaappaa.

Unamminerup immikkoortua siulleq naammassiliivinnera brasiliamiu Paulinho periarfissaneqqikkaluarpoq. Tassani Messi aamma tunisisuusimavoq, Paulinhollu niaqqumik isertitseriaraluarnera Navasimit annaanneqarpoq.

Unamminerullu immikkoortuani siullermi Karim Benzema kingulliulluni periarfissaginnerpaasimavoq. Marcelop kusanartumik qeqqanoorinerani franskip arsaq niaqqumik iserteriaraluarpaa målilli napasuat eqquinnarlugu.

Muminnermi 0-0-qqapput, sivisunngitsumilli. Minutsit 54-issaanni Barcelona 1-0-mik siuarpoq.

Arsaaffiup qeqqaniittartoq Ivan Rakitic arsaq siumut ingerlannissaanut inissaqarluarsimavoq. Naqqatigut sukkasuumik tunioraattoqarneratigut arsaq Luiz Suarezimut tunniunneqarpoq, taassuma Navas ataaqqullugu isertippaa 1-0-millu siuarlutik.

Minutsit 63-issaanni Real Madrimut ajorseriaannarpoq. Paatsiveerusimaarnermi Suarezip misiliinera Navasip annaappaa. Kinguninngua Paulinho niaqquminik misiliingaluarpoq, Daniel Carvajalillu assaa akornutaasimavoq.

Carvajal aappaluttumik nittaavigineqarpoq, kinguninngualu Messi eqqissilluinnarluni isertitseriarluni.

Taassuma arsaq teqeqquatigut isertippaa unamminerlu aalajangerneqarluni. Minutsini kingullerni Aleix Vida 3-0-mik siuartitsivoq, Barcelonalu Realikkunniit sisamaattut inisseqqasuniit 14 poinitinik amerlerusunik pointeqarnerulerput.

Atlético Madrid aappaattut inissisimallutik pointinik quligiluanik kingulliupput, Valencialu kingulliunerulaarlutik 11 pointinik inorsarput.