Rasmus Lyberth ukiumi erinarsuusiullammattut toqqarneqartoq

Erinarsortartoq erinarsuusiortartorlu Rasmus Lyberth arfininngormat Danish Music Award Folkip nersornaasiinerani nersornaaserneqarpoq.

Nersornaasiineq ingerlanneqarpoq Københavnimi Vesterbromi kulturip inuillu illuanni Absalonimi.

Rasmus Lyberth immikkoortuni pingasuni nersornaasigassatut inassutigineqarsimavoq: Ukiumi saqqummersitsisutut, ukiumi erinniullammattut aamma ukiumi erinarsuusiullammattut. Ukioq mannalu nersornaasiinerit naammassimmata Rasmus Lyberth ukiumi erinniullammattut toqqarneqarsimavoq.

Ilisimasalinnit inassutigineqarpoq

Rasmus Lyberth nuusiani nersorneqartorujussuaq Alaatsinaassuseq Aquttoralugu pissutigalugu inassutigineqarsimavoq.

Sermitsiaq.AG-p Rasmus Lyberth sapaatiummat apersorpaa. Nersornaaserneqartullu isertuutinngilaa nersornaaserneqarnini nuannaarutigisorujussuullugu. Minnerunngitsumik nipilersornermi inuit ilisimasallit inassuteqaatinik assigiinngitsunik suliarinnissimammata.

Nangikkusuppaa

– Suliamut nersorneqarneq nuannersuuvoq. Taamatut nersorneqarnikkut amerlanerusunik erinarsuusiorusulerpunga, amerlanerusunillu takkuttoqassaqqaarpoq, Rasmus Lyberth oqarpoq nangillunilu:

– Tassami erinarsukkanik nutaanik sanassaanga. Tusarnaartitsinerit tamaasa erinarsuutit taakkuinnaat atortuaannarsinnaanngilakka. Tamatigut misigissutsikk suliniutigisartorujussuuvakka, nutaanillu takkuttoqartuaannarpoq ingerlakkusutannik.

Kalaallit Nunaat pilluarit

– Kalaallit Nunaat tamaat pilluaqqorusuppara. Kalaallit Nunaannut tamarmut nersorinninneruvoq tamatigut kalaallisut erinarsortarlunga ukiumi erinarsuusiullammattut toqqarneqarama Rasmus Lyberth erseqqissaavoq.