Torrak!
Rasmus Klumpi nuannarineqaqaaq
Nanuaraq nuannaartunartoq kalaallit meerartaasa nuannaraat. ´Rasmus Klumpi´-p atuaganngorlugu saqqummersinneqarnerata kingorna sapaatit akunneri marluinnaat qaangiuttut iperaq.com nalunaarpoq nungunneqareersimasoq
Rasmus Klump ateqarpoq »Rasmus Klumpi«, Skæg ateqarpoq »Umilik« Pelle-lu atserneqarsimavoq »Piili«, tamatumali saniatigut »Rasmus Klumpi orpiliarlu«-p kalaallisuua manna tikillugu qallunaat meerartaasa kisimik atuartagaattut illuinnarpoq. Decembarip 5-anni atuagaq Nunatsinni saqqummersinneqarpoq, naqiterisitsisullu Iperaq.com-ip imaasiallaannaq nungunneqarmat kakkageqaa.
Rasmus Klumpi nunatsinni ilaqutariinnit meerartalinnit ilisimaneqareerpoq katitertakkat, tegnefilmit spil-apps-illu aqqutigalugit, aatsaalli siullermeersumik Rasmus Klumpi atuaganngorlugu saqqummersinneqarpoq, piumaneqarluarneratalu takutippaa taanna amigaatigineqarsimasoq.
–Tunisaanissaanut isumalluarsimavunga, takorloorsimanngisaannarparali atugaq sapaatit akunneri marluinnaat ingerlareersut nungussimassasoq. Ilimanarpoq kaallisut meeqqanut atuakkiornermi torrallaasimasugut, naqiterisitsisarfiup pisortaa Katti Frederiksen, Iperaq.com, oqarpoq.
Rasmus Klumpi siullermeersumik kalaallisut oqalutsinneqanngilaq. Piffissami 1956-imiit 1973-imut Rasmus Klump nunatsinni aviisimi nuna tamakkerlugu saqqummersartumi ilaasarsimavoq. Tamatumali kingorna kalaallit meerartaasa Rasmus Klumpip misigisartagai qallunaatuinnaq atuarsinnaasimavaat.
´Rasmus Klumpi orpiliarlu´ 1500-unngorlugu naqiterneqarsimavoq.
Egmont Publishing, Rasmus Klump-imik piginnittoq, naqiterisitsisarfimmik Iperaq.com ukiunut marlunnut isumaqatigiissuteqarsimavoq. Suli aalajangerneqanngilaq saqqummersitat sorliit kalaallisuunngortinneqarumaarnersut, pilersaarutaavorli Rasmus Klumpi-mik amerlanerusut saqqummersinneqassasut, aamma e-bog-igut aamma lydbog-itut.