Randip AG isornartorsiorpaa

Aningaasaqarnermut naalakkersuisup, Randi Vestergaard Evaldsenip (D), Inatsisartunut akissummi oqaaseqaat, Namminersorlutik Oqartussat pisiniaraangata kalaallinut kiffartuussisunut pisinermut tunngatillugu atuffarliorneqarnerarlugu AG isornartorsiorpaa.

Atuaruk: Naalakkersuisut oqariartuutaat: ‘Nunatsinneersunik pisigit’ itigartikkaat

Sanguneq
AG-mi allaaserisami 'Nunatsinneersunik pisigit' itigartikkaat, tassani Naalakkersuisut allamut sangunerarneqartut atuarneqarsinnaavoq. Tassungalu tunngatillugu aviisip akissuteqarluni oqaaseqaat issuarpaa:

- ‘Nunatsinneersunik pisigit’ eqqarsaatigalugu innersuussinermi maluginiarneqassaaq apeqqusiinngivilluni nunatsinni suliffeqafimmit inniminniineq imaanngimmat tamatigut inuiaqatigiinnut iluaqutaasartoq.

- Unammillernermut atatillugu tamanna pilersuisut ikilinerannik akillu qaffannerannik kinguneqarsinnaavoq. Aamma piariaqarpoq nunatsinni inuussutissarsiortut nunani allaneersunik unammilleqatigiinnikkut peqqinnartumik ineriartornissaat pitsaasumik sulineq, aningaasartuutikillisaaneq nutaaliornerlu tunaartarineqarlutik, issuaanermi allaqqavoq.

Isumaa allanngortitaq
Randi Vestergaard Evaldsenip oqaaseqarnermini Namminersorlutik Oqartussat nittartagaatigut illuanik tikkuarpaa, issuaanerit oqaaseqatigiinnit annerusunit tigulaagaasut.

- Oqaatsit 'pinngitsoorani' aamma 'isornartoqanngitsumik', matumani pingaaruteqarluinnarput (issuaanermi, aaqq.). Oqaatsit naammattumik nassuiarpaat, ilaatigut pisoqarsinnaasoq, sumut pisinissap qajassuunneqartariaqarneranik. Ilaatigut pisinnaavoq, inuiaqatigiit iluanni unammilleqatigiinneqanngilluinnarpat – taamaattumillu akiusut qaffasippallaarsinnaapput, pisariaqalerlunilu neqeroorutit itigartinnissaat, neqeroorutillu unammilleqatigiinnut amerlanerusunut nassiunneqartariaqarnerat, Randi Vestergaard Evaldsen allaaserisamut oqaaseqaateqarnermini naqissusiivoq.

Annertuallaalersinnaasoq
- Tamatumunnga tunngatillugu, amerlanerpaat isumaqatigissagunarpaat, pisiassap/kiffartuussinerup akisuallaarneranik, neqeroorutip itigartittariaqarsinnaanera. Isumaqanngilluinnarporli nunami maani pisiniartarneq Naalakkersuisut annertusarusunngikkaat. Tamanna erseqqinnerusumik naqissusersinnaanngilara, Naalakkersuisunut ilaasortaq ilanngullugu oqarpoq, akissummilu allamik issuaanermik tikkuaalluni:

- Aqutsisoqarfimmi (ASA, red.) siunnerfeqartumik suliarineqartarput neqeroortitsinermi pisiortornermilu ingerlatseriaatsinik aaqqissuussinerit, tassa kalaallit suliffeqarfiutaat unammilleqatigiinnermi peqataasinnaanerat periarfissillugu.

Ikiorneqarsinnaasut
Randi Vestergaard Evaldsenillu aamma erseqqissarpaa, akissuteqaatip assigiinngitsutigut suliffeqarfiit nunatsinneersut kiffartuussisunngornissaannut siuarsaasoqarsinnaasoq tikkuaraa, assersuutigalugu toqqartuinermik tunniussisarnissamulluunniit piumasaqaatit imaluunniit najukkami pilersuisut, suleqatigisartakkat allallu aqqutigalugit.

AG-mit oqaaseqaat
Sermitsiaq.AG-p AG-mi aaqqissuisuuneq, Christian Schultz-Lorentzen, Naalakkersuisunut ilaasortap isornartorsiuineranut oqaaseqarnissaanut qinnuigaa.

- Randi Vestergaard Evaldsenip maluginngitsoorsimanavianngilaa, Inatsisartut oqaluttarfiannit tassunga tunngatillugu oqaaseqaatini sakkortuumik oqallitsitsisoq, politikerillu arlallit isornartorsioraat, uanilu sapaatip akunnerani AG-mi saqqummertumi tusagassiortup tamanna allaaseraa. Nammineq ataatsimiittarfimmiippoq, Christian Schultz-Lorentzen oqarpoq, nangillunilu:

Kisimiinngitsoq
- Allat aamma tassani Randi Vestergaard Evaldsenip aviisimut pisuutitsissutaani atuffarliorlutik pisuunerarput, ilaatigullu uani akissuteqarluni oqaaseqaammi aallaaveqartumi: Nunatsinni inuussutissarsiorneq peqqinnartumi, nunani tamalaani unammillernermik ineriartortinneqarnissaa pisaqariaqarpoq.

- Taanna isuma Randi Vestergaard Evaldsenip itisilernissaa tusarusuttorujussuuarput, taamaattumillu AG-mit apersorneqarnissaanut attaveqarfigaarput. Aammalu akissutitut oqaaseqaatip qitiusumi imaa allaaserisami saqqummersinnikuuarput, atuartartut namminneq Naalakkersuisut isumaaq qanoq isumaqarnersoq isummersorfiginiassammassuk. Tamannalu ajornaatsuinnaaneq ajorpoq, aaqqissuisuuneq oqarpoq.