Randi: Marlunngorpat aatsaat qinersisoqassaaq
Qinersisartunik isumasiuinermi siuariaateqarsimaneq Demokraatit siulittaasuata nangaassutigaa
6.9 procentimik siuariaateqarneq ilaasortallu marluk siulittuutigineqarput Allat nuannaarutigissangaluarpaat. Demokraatilli siulittaasuat Randi Vestergaard Evaldsen silatusaaqqusivoq.
- Qinersisartunik isumasiuinerinnaavoq, marlunngorpat aatsaat qinersisoqassaaq, taanna Sermitsiaq.AG-mut oqarpoq.
Isumasiuineq naapertorlugu, HS-Analysimit Sermitsiamut KNR-imullu suliarisimasaani Demokraatit 18,8 procentimik angusaqassapput, tassa arfinilinnik ilaasortaateqalissapput. Qinersisartunilli isumasiuinerit qinersinerup kingorna allannguuteqarluinnartarsimanera, Randi Vestergaard Evaldsnip oqaatigaa.
- Qinersivik kingullermi marlunnik ilaasortaatitaqalernissarput ilimagineqarsimavoq, sisamanillu ilaasortaatitaqalersimavugut. Allannguisoqarsinnaalluarpoq.
‘Thomsenip-sunniinera’
Mianersornissamullu pissutissaqarluarsinnaavoq. Apriilimmi 11-aniit 15-ata tungaanut isumasiuinermi 25 procentit suli aalajangersimanngillat. Taamaammat qineqqusaarnerup naammassiartornerani allannguisinnaasut suli amerlapput.
- Periuserisimasarput qinersisoqarnissaata tungaanut ingerlatiinnassavarput, Randi Vestergaard Evaldsen oqarpoq.
- Vi arbejder målrettet videre efter den strategi, som vi har lagt - helt frem til valgdagen, siger Randi Vestergaard Evaldsen.
Taanna naapertorlugu Demokraatit isumasiuinermi siuariaateqarsimanerat, partiip oqariartuuteqarluarsimaneranik pissuteqarpoq.
- Isumaqarpugut piviusorsiornerusumik ersarinnerusumillu politikkeqartoqarnissaa pisariaqartinneqartoq.
Taassuma sanitigut qineqqusaartoq ingammik erseqqissarpaa.
- Qineqqusaarnermi Niels Thomsen assut isumaqarsimavoq. Sanngiiffigisarsimasagut ersarilluinnartumik nipeqarluni peqataaffigisimavai. Ingammik aalisarneq pillugu, tamannami misilittagaqarfigilluarpaa.