akiliisitsiniarneq
Randi V. Evaldsen: Ilanngaassivik tamanut atuutissanngilaq
Akiliisitsiniarnermut aaqqiissutissaq nutaaq Ilanngaassivik, innuttaasut akissarsiaannit pisortat tigusisarfissaat, Demokraatinit taperserneqarpoq. Kisianni akiligassaqanngitsunut atuutissanngilaq, partiip siulittaasua Randi V. Evaldsen oqarpoq.
Akiliisitsiniartarnermut aaqqiissut nutaaq pillugu Naalakkersuisut inatsimmut siunnersuummut tusarniaassummik saqqummiusseqqammerput. Taanna ukiumi nutaamit atuutilissaaq, innuttaasullu aningaasarsiaat tunniunneqannginnerini pisortani oqartussat aqqusaaqqartassallugit.
Taamaaliornikkut pisortat ineqarnermut, kiassarnermut imaluunniit meeqqerivinnut akiligassanik pisortat tigusisinnaassapput.
Demokraatit akerliunngillat
Siunnersuut siullermik Demokraatinit siunnersuutigineqarsimasoq aamma partiip siulittaasuanit Randi V. Evaldsenimit taperserneqarpoq.
- Tamanna (Ilanngaassivik, aaqq.) tunngaviatigut ajorinngilluinnarparput, kisiannili akiitsoqanngitsunut atuutsinnissaa isorilluinnarparput, Demokraatini siulittaasoq Randi V. Evaldsen oqarpoq.a
Aamma atuaruk: Naalakkersuisut akiliinerluttartunut sukaterilerput
Inuit kiffaanngissusaannut eqquinerluttoq
Tamanna allanngortinneqanngippat Demokraatit ilanngaaserivimmut nutaamut peqataasinnaanngitsut, Randi V. Evaldsen naqissusiivoq.
- Demokraatit uani oqartariaqavissorpugut, peqataaffigisinnaannginnatsigu inuit ataasiakkaat pisortanut akiitsoqanngitsut aningaasaataat pisortaniit aqunneqalernissaat. Inuup ataasiakkaap kiffaanngissusaanut eqquinerlorujussuartutut isigivarput, Randi Vestergaard Evaldsen oqarpoq nangillunilu:
- Taamaattumik Ilanngaassivik taamaallaat atorneqassaaq inunnut pisortanut akiitsulinnut.
Innuttaasut nammineq aningaasaqarneq ilinniassavaat
Ajornartorsiut pinaveersaartinniarlugu siunissami iliuuseqartoqarnissaa aamma Randi V. Evaldsenip takorusuppaa.
- Siulleq iliuusissaq tassaavoq, akiitsullit akiliisissallugit. Taassumap saniatigut pilersitsissaagut siusinaarluni iliuuseqarnermik, tassa inuit akiitsoqalrsinnagit iliuuseqarnikkut. Innuttaasut angerlarsimaffimmi aningaasaateqarneq, missingersuisinnaaneq, atuinerlu ilikkarniassammassuk. Taamaalillutalu pisortanut akiitsut minnerpaaffianiitinnissaat anguniarnissaanut ikioqatigiilluta tunaartaqassaagut.
Ukioq kingulleq pisortanut akiitsut 830 millionit koruunit missaanniipput. Ukioq mannalu 935 millionit koruunit missaanniipput.