Demokraatit

Randi: - Nammineq aalajangiisinnaassuseq suli tapersersorparput

Siullermik Poul Hansenip maannakkullu Michael Rosingip Demokraatinit ilaasortaajunnaarnerannut, partiimi siulittaasup Randi Vestergaard Evaldsenip aqutseriaasini pissutaanngitsoq isumaqarpoq.

Naggataatigut tamarmi asuliinnaavoq.

Upernaap ingerlanerani Demokraatini partiimi aqutsisut aamma Michael Rosingip akornanni aaqqiagiinnginneq iluarsiniarlugu nukippassuit atorneqaraluarput. Kisianni ullumi ukiorpassuarni ilaasortaasoq partiimit anivoq.

- Iliuuserisinnaasagut iliuuserereerpagut. Tassunga nukippassuit aningaasarpassuillu atorpagut, kisianni maanna Michael Rosingip aalajangiinera ataqqiinnartariaqarparput, Demokraatit siulittaasuat Randi Vestergaard Evaldsen, Sermitsiaq.AG-mut oqarpoq.

- Suleqatigiinnermut suliaanullu qujaannassaagut. Taanna soorunami nammineq aalajangersinnaatitaavoq, ilaarusulluni ilaarusunnginnerluniluunniit.

Sineriak ukkatarinerullugu
Partiip tunngaviusumik isummani arlalitsigut sumiginnaaffigigai, Michael Rosing isumaqarpoq. Kisianni taamaatut isornartorsiorneq Randi Vestergaard Evaldsenip isumaqatiginngilaa. Kisianni partii aqqutinut allanut ingerlalersimasoq ilalerpaa.

- Sineriammi immikkoortoqarfinnik pilersitsiortuleruttorpugut, taamaalillutalu sineriak tamaat aatsaat siornatigornit ukkatarineruleriartorparput. Aap, ilaatigut allanngortoqarpoq, taanna oqarpoq.

Atuaruk: Michael Rosing isumaqarpoq Demokraatit naleqartitaminik sumiginnaasoq

Ukiup affaani marluk
Ukiup affaata ingerlanerani ukiorpassuarni ilaasortap aappaata Demokraatit qimappaat. Poul Hansen maajimi ilaasortaajunnaarpoq.

- Piffissap sivikitsup ingerlanerani ilaasortat marluk partiimit tunuarmata, aqutsinerpit isumaliutigeqqinnissaanut eqqarsartitsiva?

- Namminneq sooq ilaasortaajunnaarnerlutik akisinnaassavaat, kisianni immaqa sammivinnut nutaanut peqataarusunngillat, Randi Vestergaard Evaldsen oqarpoq.

Isornartorsiornerit akerlilerai
Demokraatit sukkut tunngavitsigut isummersornermik uniuinersoq, Michael Rosing aalajangersimasunik pingasunik taakkartuivoq.

Aningaasanut inatsit avaqqullugu Tasiilamut immikkut ittumik aningaasaliissuteqartoqarneranik siunnersuuteqarneq kukkunerusoq, taanna aamma isumaqarpoq.

- Tasiilami imigassamik, atornerluinermik aamma imminut toquttarnermik imaannaanngitsunik ajornartorsiuteqarneq isiginianngikkutsigu eqqumiigaara. Aningaasanik immikkoortitsisoqassasoq isumaqarpugut, aammalu najukkami qanoq atorneqarnissaat aalajangiunneqassasoq, partiimi siulittaasoq akivoq.

Ilanngaassivimmut tapersersuineq Demokraatit inuit nammineq aalajangiisinnaanerannik ilungersuuteqarnermut akerliusoq, Michael Rosing aamma isumaqarpoq.

- Nammineq aalajangiisinnaasuseqarneq suli tapersersorparput, kisianni aamma pisortanut akiitsut 1 milliardingajaanerat paasisasariaqarparput. Kisianni nammineq akiliisinnaasut taanna atussanngilaat, Randi Vestergaard Evaldsen oqarpoq.

Avataasiorluni aamma sinerissap qanittuani raajartassiissutit agguaateqqinneqarnerannut tunngatillugu, pissutsinut piviusunut tulluarsaasoqartoq, taanna isumaqarpoq.

Poul Hansenip aamma Michael Rosingip saniatigut, Sermitsiaq.AG-p paasissutissaatai naapertorlugit, qaammatit kingulliit ingerlanerini ilaasortat sisamat minnerpaamik partiimut ilaasortaajunnaarsimapput.

Powered by Labrador CMS