Demokraatini saqitsaanneq
Randi: Marlunnik qinigaaffeqarneq ajornartorsiutaanngilaq
Piffissami kingullermi Demokraatit iluminni eqqissiviillioraluartut, partii saanngiillisimanngitsoq, partiip siulittaasua Randi Vestergaard Evaldsen isumaqarpoq.
Ullumi Demokraatini politikeri misilittagartooq, Poul Hansen ilaasortaajunnaarpoq.
Taassuma aalajangernera partiip siulittaasuata, Randi Vestergaard Evaldsenip, tusaatissatut tiguaa.
- Poul Hansenip Inatsisartuni kommunalbestyrelsimilu suliai pillugit qujassuteqarfigersuppara, taanna Sermitsiaq.AG-mut oqarpoq.
Aamma atuaruk: Poul Hansen Demokraatinit ilaasortaajunnaartoq
Marlunnik qinigaaffiit saqitsaassutigineqartut
Partiip Inatsisartuni ilaasortaatitaani sisamani pingasutmarlunnik qinigaaffeqarnerat, Poul Hansenip isornartoqartippaa.
Taanna isumaqarpoq, partiip tunngavianut akerliusoq.
- Demokraatit tunngavilerneqarneraniilli Inartisartunut kommunalbestyrelsimulli marlunnik qinigaatitaqartarsimapput, Randi Vestergaard Evaldsen Sermitsiaq.AG-mut oqarpoq.
Aatsaat Inatsisartuni sulitilluni saniatigut Folketingimi borgmesteriunissarluunniit ajornartorsiutitut isigilertaripput.
- Isumaqarpugut marlunnik qinigaaffeqarneq sapinngikkaanni ajornartorsiutaanngitsoq. Qinersisartummi ilisimavaat, kommuninut qinersinerminni Inatsisartuni issiasugut, partiip siulittaasua tunngavilersuivoq.
- Pisussaaffeqarpugut, akisussaaffigaarpulli ingerlanneqarnissaanut.
Aaqqiagiinnginneq
Poul Hansenillu aaqqiagiinngissut alla eqqaavaa politikeri misilittagaqarluartoq, tassaasoq Michael Rosingi.
Taamaattoq Poul Hansenip tunuarnera Randi Vestergaard Evaldsenip eqqissilluni tiguaa.
- Polikerit piffissap ingerlanerani partiiminnik taarsiisarnerat, tupinnartuliaanngilaq, taanna oqarpoq.
- Suli ataqatigiilluarpugut
Michael Rosingi Poul Hansenituulli marlunnik qinigaaffeqarneq iluarinngilaa.
Aaqqiagiinngissuteqarnermi aaqqiissutissaqartoqarnersoq, taassuma oqaatigerusunngilaa. Taanna suliap ingerlanneqarneranut tikkuussiinnarpoq.
Aaqqiagiinngissuteqararluartorli taanna isumaqarpoq partii ajunngitsumik ingerlasoq.
- Demokraatit nukittulluartut, suli isumaqarpunga. Piffissap ilaani partiit tamarmik iluminni aaqqiagiinngissuteqartarput, aamma politikkikkut aaqqiagiinngissuteqanngilagut, Randi Vestergaard Evaldsen naggasiivoq.