Skip to main content

Randi Hans Enoksenip nungusaarniarneranut: Siunnersuut eqqarsaatigilluagaanngitsoq

- Uggorisaqaara politikerit tusaqqusaaginnarlutik nuannareqqusaaginnarlutillu imminuinnaq eqqarsaatigileraangata nunarput puigorlugu, taama Demokraatit siulittaasuat Randi V. Evaldsen Hans Enoksenip Namminersorlutik Oqartussat suliffeqarfiutaani siulersuisuni nungusaaniarluni piumasaqarneranut isornartorsiulluni oqarpoq.

Demokraatit siulittaasuat Randi Vestergaard Evaldsen Hans Enoksenip Namminersorlutik Oqartussat suliffeqarfiutaani siulersuisuni nungusaaniarluni piumasaqarneranut isornartorsiuisunut ilannguppoq, Hans Enoksen, Namminersorlutik Oqartussat suliffeqarfiutaani siulersuisuni ilaasortanik nungusaaniarluni piumasaqarniarnerminik tallimanngornermi nalunaaruteqareertorlu.

- Namminersorlutik Oqartussat suliffiutaanni siulersuisunut ilaasortat soorunami toqqarneqartassapput piginnaasaat pisinnaasaallu tunngavigalugit. Tamanna nunamut iluaqutaanerpaassaaq. Allat pissutigalugit toqqaasoqartassappat nuna innarlerneqassaaq. 

Taama Demokraatit siulittaasuat Randi Vestergaard Evaldsen tusagassiuutinut nalunaaruteqarluni allappoq.

LÆS OGSÅ: Sara Olsvig: Enoksen innermik pinnguarpoq

Inuiaqatigiit aningaasaataat pineqarput

Hans Enoksenip suliniutini iluatsissaguniuk, qinersinerminilu taperserneqassaguni - nungusaanermik annerusumik kinguneqassaaq - maanna siulersuisuni siulittaasut arfineq-marluk aamma ilaasortat 23-it peerneqassammata.

- Demokraatinut pingaaruteqarluinnarpoq ingerlatseqatigiiffiutigut siulersuisoqassammata ingerlatseqatigiiffinnik ingerlatsinissamu eqqortunik piginnaanilinnik pisinnaassusilinnillu pineqarmatami inuiaqatigiit aningaasaataat, Randi Vester Evaldsen allappoq, nangillunilu:

- Ilaasortat nunat allaneersut piginnaanermik misilittakkamillu saniatigut immikkut ilisimasaqarsinnaapput niuerfinnut aalajangersimasunut, tunisassianut aalajangersimasunut imaluunniit attavinnut, namminersorlutik oqartussat ingerlatseqatigiiffiisa iluaqutigisinnaasaannik. 

LÆS OGSÅ: DF-eq Hans E-ip siunnersuutaanut: Siunnersuut ajorluinnartoq

Randi: Unammillersinnaassuserput innarlerneqassaaq

Hans Enoksenip isumaa naapertorlugu nunaqavissoq kalaaliuvoq, kisianni aamma qallunaanik nunaqqateqartugut ukiorpassuarni nunaqqatigisimasatsinnik.

- Iluaqutaanngilaq immitsinnut mattulluta ingerlatseqatigiiffinni siulersuisussanik nunaqavissuinnarnik toqqaasalernissarput soorlu Hans Enoksenip siunnersuuteqarneratut. Unammillersinnaassuserput innarlerneqassaaq tamatumalu kinguneranik ingerlatseqatigiiffinni isertinneqartartut appassapput. Tamanna kialluunniit soqutigisarisinnaanngilaa, Randi Vestergaard Evaldsen isummersorpoq.

Randi Vestergaard Evaldsenilli naqissuserpaa isumaqannginnerarluni nunaqavissunik siulersuisuni pisariaqartitsinngittugut.

- Nunaqavissut tunniussaqarsinnaapput kulturitsinnut, niuerfitsinnut najukkamilu pissutsinut ilisimasanik annertuunik. Oqimaaqatigiissitsineq eqqort9oq nassaarisassaavoq siulersuisut sapinngisamik nukittunerpaat piginnaaneqarnerpaallu nassaarissangaanni. Tamanna nunatsinnut pitsaanerpaasussaavoq.

LÆS OGSÅ: Enoksen: Siulersuisunut ilaasortat 30-t nungusarneqassapput

Piviusunngortittariaqanngilluinnaqqissaarpoq

Randi Vestergaard Evaldsen nangilluni allappoq Hans Enoksenip siunnersuutaa nunaqavissut kisimik namminersorlutik oqartussat suliffeqarfiutaasa siulersuisuini toqqarneqartalernissaat eqqarsaatigilluangaanngitsoq piviusunngortittariaqanngilluinnaqqissaartorlu. 

- Uggorisaqaara politikerit tusaqqusaaginnarlutik nuannareqqusaaginnarlutillu imminuinnaq eqqarsaatigileraangata nunarput puigorlugu. Tamatta akisussaaffigaarput nukittunerpaanik inuiaqatigiinnik pilersitsinissarput. Taamaattoqarnavianngilarlu piginnaaneqarluartunik mattussuisassagutta - tamanna aatsaat pinngitsoortissinnaavarput peqataatitsinitsigut aamma tamakkiisumik eqqarsarnitsigut, Randi Vestergaard Evaldsen naggasiivoq.

LÆS OGSÅ: Tillie Martinussen: Hans, tassa

          

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER