Ramsdal Carsten F. Hansen pillugu: Tamanna akerusuppianngilarput

Siulittaasup Naalakkersuisoqarfianit aamma tikkuussisoqarsimava Naliliinermut Ataatsimiititaliap politiinit unnerluutigineqartoq Carsten Frank Hansen Aningaasaqarnermut Nunallu iluani Pissutsinut Naalakkersuisoqarfimmi pisortap soraarsitaasup Jan H. Lynge Pedersenip taartissaatut tikkuarmagu?
Tamanna ilimanarluinnarpoq, tassami sulisussarsiuussinermik selskabi Ramsdal A/S Radioaviisimut oqarmat akisussaassut namminersorlutik oqartussat ingerlatsivimmut sulisussarsiuussisarfimmut tutsinniarsarigaat.
Tassami pisortap akiumanngilaa Carsten Frank Hansen atorfinitsinneqarsimanersoq ingerlatsiviup paasiniaanera tunuliaqutaralugu, imaluunniit taanna Siulittaasup Naalakkersuisoqarfianit inassutigineqarsimanersoq.
– Carsten Frank Hansenip atorfinitsitaanissaa ilissi inassutigaasiuk?, knr.gl-ip pisortaq Karl-Erik Ramsdal Nielsen aperaa.
– Tamanna akerusuppianngilara, taanna Radioaviisimut oqarpoq ilanngullugulu oqarluni isumaqarluni selskabip isumaqatigiissut naammassisimagaa.
Carsten Frank Hansen ulluni marluinnarni atorfeqareerluni tunuarpoq, paasineqarmat Fynimi Danske Andelskassers Bankip immikkoortoqarfiani siusinnerusukkut pisortaasimanerminut atatillugu peqquserluuteqarsimasutut unnerluutigineqarsimasoq. Politiinut nalunaarut malillugu aningaaserivik 335.000 koruuninik annaasaqartissimavaa.
Suliamut tunngasut, KNR-p takunnissinnaaffigisai malillugit Aningaasaqarnermut Nunallu iluani Pissutsinut Naalakkersuisoqarfimmi pisortassamut piumasaqaatit paatsoorneqarsinnaanngillat. Taamaakkaluartoq qinnuteqartunit arfineq-marlunnit Carsten Frank Hansen toqqarneqarsimavoq.
Carsten Frank Hansenimik mamianartuliornermik Sermitsiaq.AG-p allaaserisai tamaasa atuakkit